Jk ghoten scherer beke(n)ne vnd(e) bethughe ope(n)bare in desseme breue . Dat ik mẏt wẏlle(n) vnd(e) mẏt vulbord mẏne rechte(n) erfname(n) vnd(e) mẏner negheste(n) vru(n)t reddeliken / vn(de) reckelike(n) hebbe varkoft vnd(e) vorkope vnd(e) vorlathe to eneme ewẏghen kofte(n) kope . Deme beschedene(n) ma(n)ne Johan lutteke(n) borgher to deme sunde vn(de) sẏnen / rechte(n) erfname(n) . Vor zeuen vnd(e) zeuentich . mark sundysscher pe(n)ny(n)ghe . de he mẏ noghaftighe(n) vnd(e) wol to dancke an rede(n) pe(n)ny(n)ghe bereth vnd(e) ghetellet heft / vor der maky(n)ghe desses breues . Dat ghud to kubesse mẏt der haluen morghen hoẏwẏsch also alse ik dat ghud dar hadde . dar de sulue johan lutteke dat ho=/gheste vnd(e) dat sẏdeste ane heft vnd(e) dar he ok twe vnd(e) twyntich schylly(n)gh gheldes ane hadde vnd(e) myt alle des vorbenomede(n) ghudes to behory(n)ghe so dat / ghud nu lẏcht vn(de) ẏe va(n) oldy(n)ghes gheleghe(n) heft by(n)ne(n) alsẏner schede vnd(e) ende(n) also alse mẏne oldere(n) vore vnd(e) ik na dat bezethe(n) hebbe(n) . also schal ẏd johan / lutteke vn(de) sẏne erfname(n) bruke(n) bezẏtte(n) vnd(e) hebbe(n) to knezẏtze(n) rechte to ewẏghen tyde(n) vnd(e) allet des ik dar hadde . vnd(e) dar nẏchtes nẏcht ane vthe nome(n) / ẏd sẏ benomet edder vmbenomet also ghantz vnd(e) also degher dat ik noch mẏne(n) erfname(n) dar nẏchtes nẏcht ane beholde(n) Dẏt vorben(omede) ghud schal ik vnd(e) / mẏne erfname(n) . em vnd(e) sẏne erfname(n) vrẏge(n) vnd(e) entwere(n) vor alle ansprake ghesteliker vnd(e) werliker persone(n) de vorrecht kome(n) wẏllen . Alle desse / stucke de loue ik vorscreue(n) ghote(n) scherer mẏt mẏnen rechten erfname(n) johan lutteke vn(de) sẏne(n) rechte(n) erfname(n) in ghude(n) truwe(n) stede vn(de) vast to holde(n)de / vnd(e) vnghebroke(n) sunder ẏenẏgherleẏge arghelẏst hulperede vnd(e) weddersprake To merer bewary(n)ghe vnd(e) bekantnẏsse so hebbe ik my(n) ẏngheseghel / ghehe(n)gghet vor dessen bref . hẏr hebbe(n) an vnd(e) ouer ghewesen beschedene ma(n)ne he(n)ny(n)gh rode vn(de) herbert duͦregghe borghere to deme suͦnde de dorch / vnser bede wẏlle(n) ere ẏngheseghele . alse to thuͦghe vn(de) to ener wẏtlicheẏt alle desser dẏngh hebbe(n) ghehe(n)gghet vor dessen bref . De ghescreue(n) ẏs to / deme Sunde Na godes bord . an(no) . M . CCC . in deme Sos vnd(e) neghentigheste(n) ẏare des dẏnxstedaghes vor vastelauende