Wy Lambrecht horn Margareta zyn husurowe vn(de) Conradus horn ere sone bekennen vn(de) betughen openbare in / desser scrift dat wy myd buraden muͦde vn(de) mid willen vn(de) vulbort vser erfnamen vn(de) vnser vrunde hebbe(n) redde=/liken vn(de) rekkeliken to eneme ewighen kope vorkoft vn(de) vorlaten vn(de) vorkopen vn(de) vorlaten in desser scrift deme / Erbaren Rade to deme sunde vnde eren menen nakomelingen dar wy vul vore entfanghen hebben to der / noghe eͤr der makinghe desses breues Alle vnse gud dat wy hat hebben to Cymmekendorp alse dat licht bynne(n) / zynen scheden an akkere buwet vn(de) vnghebuwet an wische . weyde . watere . waterlop an møre an torue an struke / an buschen vn(de) anholte an weghen an steghen mid aller nuͤt vn(de) vrucht de nu ist vn(de) de dar werden magh myd / aller rechticheit vn(de) vryheiden de dar to is also vrygh alse vnse voruaren tovoren vn(de) wy na dat alder vrygest ghe=/hat vn(de) beseten hebben vns dar nichtes ane tobeholdende vredesuͦmmeliken to ewigen tiden tohebbende tobesittende / vn(de) to brukende vn(de) to dunde darmede nach eren willen dit vorscreue(n) gud scole wy en waren na desser vorlatinghe / yar vn(de) dagh alse yn deme lande recht is vor alle personen ghestlik vn(de) werlik de recht gheue(n) vn(de) nemen willen / dat alle desse stuͦcke stede vn(de) vast blyue(n) so hebbe wy lambrecht vn(de) Conradus gheheten horn vorscreuen vnse yn=/gheseghele henghet vor dessen breff Tughe desses dinghes zint de nomeaftighen lude alse peter dersekendorp / hermen van deme toͦrne Clawes van deme torne Arnd nypertze pritbern van derlauken de to eyner witlicheit / desser vorscreue(n) dink hebben ere yngheseghele mede ghehenghet an dessen breff , Ghegheue(n) to deme sunde na / godes bord drutteyn hundert yar dar na yn deme seuenneghentighesten yare des neghesten daghes na suͦnte / Jacobes daghe des hilghen apostel(es)