Jk Czander Bonow vor my vnde myne rechten erfnam(en) bekenne vnde bethughe apenbare yn desseme / jegenwardigen breue dat ik schal benemen . henneke hundertmarke vn(de) synen rechten eruen alle jar / to her Alleph greueraden neghen m(a)rc sundescher pe(n)nynghe wonliker mu(n)te alze nu geue vn(de) ghenge / synt vnde desse vorscr(euene) negen m(a)rc schal ik Bonow vorb(enomede) edder myne erfnam(en) geuen vn(de) bereden her / Alleph greueraden edder synen eruen al jar vp sunte mertens daghe dees hilgen bisschoppes na geuyn/ge vn(de) makynge desses breues so langhe dat ik de vorscr(euene) negen m(a)rc entvryge van henneke hu(n)dertm(a)r=/ke vorben(omede) edd(er) van synen eruen vnde weret sake dat henneke hundertm(a)rc edd(er) syne erfnam(en) desser / benemynge jenegen schaden nemen to her alleph greueraden edder to synen eruen vn(de) kofte vn(de) terynge / dar v(m)me deden deen schaden . kofte vn(de) therynghe schal ik Czander Bonow edder myne erfnam(en) . he(n)neke / hundertm(a)rke edder synen erfnam(en) gantz vn(de) aldeger vp richten vn(de) wedder leggen sunder jenegerleie / hulperede edder weddersprake vnde sunder vorvolgynge jeneges rechtes . Alle desse vorscr(euene) Artikele / stede vn(de) vast wol to holdende jn guden truwen . llawe ik Czander bonow myt myne(n) rechte(n) erfnamen / vn(de) myt mynen truwen medeloueren dee hir na screuen staen Alze Clawes bonow . He(n)nyng saptzeze / vnde Rickold van jasmu(n)de . wy alle alle lauen jn guden truwen myt ener same(n)den hand . henneke / hundertm(a)rke vn(de) synen r(e)chten erfnam(en) stede vn(de) vast wol to holdende sunder jenegerleie hulperede / edder weddersprake To merer bekantnysse vnde groter tuchnysse vnses truwen louedes so henghe / wy alle vnse jngesegele an dessen breff dede geue(n) vn(de) schr(euen) is na godes bord dusent jar veerhu(n)dert / jar dar na y(m)me achtevndeveertigesten jare jn sunte andreas daghe