Wy Borgermestere vnde Ratmanne menliken der stad Stralessund vor vns vnde vnse mene nakomelinge / bekennen vnde betugen openbare mit desseme brefe vor allen yenen beyde yegenwardigen vnde tokomenden / dede ene Seen edder horen lesen dat wy mit gantzer endracht vnde wolberademe mude hebben vorkoft / vnde vorlaten vorkopen vnde vorlaten yegenwardich mit macht desses brefes der erliken vrouwen tylsen / nalatenen wedewen seligen ludolphy bardewikes yn vortiden vnsers apotekers deme god gnade to der / tyd eres leuendes vnde na ereme dode den procuratoribus vnde vorstenderen der broderscop des kalandes / tome Sunde to behuff ener ewigen misse , dede mester gerd grope seliger dechtnisse by en toholdende / gemaket heft na ynholde synes testamentes vor drehundert mark sundesch dede wy van synen testa=/mentaryen alse mester her johan robyne her johan schelepapen her volcmar hoyers vnde her Corde / van sloten Radmanne tome Sunde vull vnde all entfangen vnde vort yn vnser stad nud gekeret hebben / er der makinge desses breffes vervndetwintich mark geldes vnde jarliker Renthe dede wy mit vnsen / nakomelingen scholen vnde willen to dancke betalen vnde wol entrichten alle jare up sunte martensdach / des hilgen bysscoppes der vorbenomeden tylsen bardewikes alle dewile se leuet vnde na erem dode / den voresechten procuratoribus vnde vorstenderen der broderscop des kalandes to der ewigen myssen / behuff vnde eren ewigen nakomelingen vorstenderen to den tyden wesende van vnde vth vnser stad bussen / schotkameren vnde redesten gude vͤmbekunnert vnde vmbehindert sunder eren schaden vnde weret / dat wy mit vnsen nakomelingen ychteswanne de voresechten vervndetwintichmark geldes to dancke / nicht beredden . vnde tylse ofte de procuratores vorbenomet des hinder vnde schaden hadden dede be=/wislik were den scholen wy vnde willen en vprichten vull vnde all Ok scholen desse vorscreuen ver=/vndetwintich mark geldes wesen quwid vnde vrig van schate van denste vnde van aller plicht / vnde vmplicht vns vnde vnser stad dar van to donde alle de wile wy den houedstol by vns hebben / jodoch so is vns vnde vnsen nakomelingen togelaten beholden vnde gegund . dat wy de voresechten / vervndetwintichmark geldes mogen wedderkopen vnde ynlosen wan wÿ suluen willen Men wÿ / scholen dat denne der vorbenomeden tilsen oft se noch up de tijd leuet den procuratoribus / edder testamentaryen voresecht touoren witlik don vnde vorkundigen laten up enen sunte joh(annes) / baptisten dach to middensomere vnde geuen en des negesten sunte martensdage dede dar na / volgen drehundert mark sundesch houedstols mit der renthe dede syk denne boret vnde na / stellinge yn enem summen wol to dancke munte alse denne tor tijd bynnen vnser stad genge / vn(de) geue is vnbewuren sunder vortoch Alle desse vorscreuen stucke vnde en islik artikel / by syk loue wy vorbenomede Borgermestere vnde Radmanne tome Stralessunde vor vns vnde / vnse ewigen nakomelingen der vorbenomeden tylsen bardewikes to der tijd eres leuendes / vnde na ereme dode den testamentarij(en) seligen mester gerd gropen vnde den procuratoribus / vnde vorstenderen der broderscop des kalandes tome Sunde vnde eren nakomelingen yn / guden truwen stede vnde vast toholdende . Des to merer bewaringe vnde zekerheid desser vor=/screuen dyng So is vnser stad Jngeseghel dat to der renthe denet beneddene gehenget an dessen / breff Geuen na godes bord verteynhundert vnde achtevndevertichsten Jare Amme hilligen / wynachten auende