Jk Bertramuͮs bisschop prester perner . to deme Sunde mit mynen eruen bekenne vnde betuge openbar in dessen breuͮe vor alssweme dat ik / enes rechten steden erfliken vn(de) ewigen kopes vorkoft vn(de) vorlaten hebbe in kraft desses breuͮes den Ersamen manne(n) Clawes arndese herma(n) seue(n)=/berge vnde jurgen platen borgere(n) dar sulues vnde ere(n) eruen vor enen summe(en) pe(n)ni(n)ge den se mi to danke vn(de) to mẏner noge entrichtet vn(de) beta=/let hebben neghen schepel gudes harden kornes alse dre schepel roggen dre schepel gersten vnde dre schepel haueren de se alle iar des neges=/ten dages Suͮnte mertens hebben vn(de) entfange(n) scholen ute achte morgen ackers de dar ligge(n) in deme velde to luttzow up der wuste(n) huͮue / alse veer morge(n) liggen to samende an eneme kampe bi her Bernd vlesches ackere Radmans to deme Sunde vn(de) ene morge(n) licht uͮp der an=/dere(n) side(n) bi her berndes ackere vn(de) de andere(n) dre morge(n) liggen ok bi her berndes ackere vn(de) eͤn iewelik morgen bi sik welke achte morghen / ackers mi tor tijd buwet hennyngh burmester dit vorschreue(n) korn schole(n) se hebbe(n) vrig vn(de) quijt alse my(n) vader seliger dechtnisse dat vor vnd(e) / ik na aller vrigest vnde vredesamest gehat vn(de) beseten hebben de se ok ut deme vorscr(euene) ackere panden mogen wan en des not is vn(de) mit den / panden don alse pachtrecht is Jk wil en ok dit vorschreue(n) korn vorlate(n) ware(n) vn(de) entfrige(n) van aller p(er)sonen ansprake de recht geue(n) vn(de) neme(n) / wille(n) alse in deme lande recht is Se moge(n) ok dit vorschreue(n) korn vort vorkopen vorsette(n) vor geuen vn(de) vor andere(n) in geistlike ofte werltlike / achte wer vn(de) weme se willen deme ofte den wil ik dessen bref holden alse he ut wiset vn(de) ik noch mine erfname(n) enbeholden an desseme vor/schreue(n) ack(er)e noch korne nicht mit alle nen tosegge(n)t noch wedderkop edder losinge sunder desse vorben(omene) kopere vn(de) ere erue(n) ofte an weme / se dat kome(n) late(n) schole(n) dat beholde(n) bruken vn(de) besitte(n) to ewige(n) tide(n) Alle stucke vn(de) artikele desses breues vn(de) en jewelik bi sik loue Jk / Bertramuͮs vorben(omede) vor mi vn(de) myne erue(n) den vorschreue(n) Clawese herma(n)ne vn(de) Jurgene vn(de) ere(n) erue(n) vnde nakomeli(n)gen in guden truwen stede vnde vast to holdende sunder alle arch vn(de) hebbe des to groter(er) vorwari(n)ge vn(de) mer(er) seke(re)rcheit myn Jngesegel mit gudeme / willen an dessen bref gehenget des to tuge vnde witlichheit de vrome(n) mane hinrik westsfal vnde Curd meyer borge(re) to deme Sunde / ere Jngesegele v(m)me myner bede willlen gehenget hebben an dessen bref de gegeue(n) vnde geschreue(n) is Na godes bort verteynhvndert / Jar dar na jn deme veftigesten iare des mondages Na deme Sondage alse men Jn der hilgen kerken synget Oculi mei s(em)p(er)