Wy clawes arndes herme(n) so(n)neberch vn(de) Jurge(n) plate borg(er)e tome sunde bokenne(n) vn(de) botuge(n) ope(n)bar / in desser schrift dat wẏ endrachtlike(n) to eneme rechte(n) ewige(n) vnwedderroplike(n) kofte(n) kope ghekoft / hebbe(n) ene(n) kathen to dem kedinge hage(n) mid eluen morge(n) ackers mid wissche weyde more dar / suluest in dem velde ute dessen vorschr(euene)n kathe(n) acke(re) vn(de) tobehoringe hebbe(n) de karthuse(re) by stetti(n) / to borende veftehalue m(a)rk sund(esch) jarlik(er) pacht Ok zo hebbe wy ghekoft achte morge(n) ackers in dem / velde to lutzowe vppe der wuste(n) houe vn(de) nege(n) schepel hardes kornes de ute den vorscr(eue)n achte / morge(n) ackers to pacht ginge(n) na uthwisinge der opene(n) bozegelde(n) breue de vns dar up gege/uen sint de wy vort gutwillich den olderluden der lowentsnide(re) ghe antwerdet hebbe(n) . dessen / kate(n) acker korne vn(de) thobehoringe legge(n) wẏ vn(de) geue(n) to der lowentsnide(re) alta(r)e to ewige(n) / tiden by deme alta(r)e to bliuende vn(de) de olderlude der lowentsnide(re) vn(de) ere nakomelinge dat altar / dar af to vorstande to ewige(n) tide(n) . Men weret zake dat ze dat altar nicht dar af vorstunde(n) vn(de) / dat gelt vnderslage(n) . wuͮrde vn(de) ze den denst gades nicht by macht helde(n) na uthwisinge des / opene(n) b(re)ues den wy en dar vp geue(n) hebbe(n) . zo schole(n) de vorstende(re) to sunte niclawes gadeshus / vullenkome(n) macht hebbe(n) de . vorb(enomede)n gude(re) an to taste(n)de vn(de) de b(re)ue van en to esschende de / vppe de gude(re) luden vn(de) dat altar dar af to vorstande to ewige(n) tide(n) na lude vn(de) jnholde / des opene(n) bozegelde(n) b(re)ues den wẏ den lowentsnide(re)n dar vppe geue(n) hebbe(n) Des to m(er)er vor/waringe vn(de) grott(er) bokantniss(e) zu hebbe wy alle vorb(enomede) vnse jnges(egele) mid wille(n) vn(de) witschop / openbare ghehenget an dessen bref Den mede hebbe(n) bozegelt alzo tughe de erlike(n) ma(n)ne / alzo gerlich van breme(n) vn(de) titkewise bozetene borge(re) tome sunde dede v(m)me vnser bede wille(n) / ere jnges(egele) hebbe(n) henget an dessen bref De geue(n) vn(de) schr(eue)n is na god(es) bort veerteynhun/dert iar dar na in dem veftigeste(n) ia(r)e in Sunte grego(r)is dage des hilg(en) pawes(tes) vn(de) lereres