Jk Conradus wenthaghen Bertoldus ludenhusen p(re)stere . Bernd vlesch Borg(er)mester . Arnd parleberch Borgher / tom Sunde vn(de) vorstendere des hilghen lich(n)ames brod(e)rschop to sunte Iacobe . wij bekennen vn(de) betughen open=/bare in desem jeghenwordig(en) breue vor vns vn(de) vnse nakomelinghe vorstendere dat wij hebben entfangen / vn(de) vp ghebort to vnser vullenkomener noghe van deme erbaren ma(n)ne her Otte voghen Borg(er)mester / in der vorscre(ue)n stat anderhalfhuͦndert m(a)rk sundesscher pen(nin)g(e) vn(de) twelff m(a)rk de wij do ok to achter weren / van pacht also dat wij ij den twelff m(a)rk gheld(es) de wij in deme houͮe hadden alse vns vn(de) vnsen nakomeling(en) / de her nicolaus haghedorne vor settet hadde . also dat wij dar nichtes nicht ane be holden in blomenberges / houͮe to lutzowe men wij sin dar gantzliken ane boret vn(de) vor noghet vn(de) wol betalt to eẏne(m) gantzen ende / to eẏner tuchnisse der warheit so hebbe wij vorstendere vorben(omede) vnse jngheseghele mẏt willen vn(de) wetenheit / to eẏner quitantzien ghehenghet an dessen breff de gheuen vn(de) ghescre(ue)n is tom sunde na god(es) bort xiiiiC jar / dar na in deme twevndefeftighesten jare vp sunte fabianus vn(de) sebastianus auende der hilghen mertelere