Jn godes namen amen Vor allen Ersame(n) in cristo gelouͮygen de dessen breff sen efte horen lesen ghestlick / effte werlick Wy borgermester vn(de) Ratma(n)ne tho dem Stral Sunde bekenne(n) vnde don wytlik myt tuchchen(isse) / desses breuͮes dat wy myt dem werdeghen vn(de) Erbar(e)n herberent moltzan kercheren tho der voghedehagen / alze eynen moder kercken vn(de) tho dem Suͦnde vnseme guͦden frunde hebben van andere(n) ghestan Wan buuͮete / grauͮen vn(de) vyskerye dar suluest tho der voghedehage(n) So hebben de Ervuerdighe i(n) got here laurentius Abbet / tho puddeglow vn(de) de ghestrenge vn(de) duchtegen herhenny(n)k van Jasmunde Rytter Hartych moltzan va(n) der / osten vn(de) Olrick moltzan va(n) dem ghruͦbenhagen vn(de) werdeghe Bugghenhagen van der Nery(n)ge marschalker des / landes bartt myt beuele des hochghebare(n) vorsten vn(de) heren heren Wartyslaff tho Stettyn pamere(n) der wende vn(de) / Cassuben hertoghe vn(de) vorste tho Rugen vnses gnedegen heren myt vns vruntliken ghehandelt den vpgena(n)ten buͦ/uͮete grauͮen vn(de) vyskerye halue(n) an den beyde(n) stouuͮediken tho der voghedehagen an desser wyse so nascreue(n) steyt So / dat wy bormester(e) vn(de) Ratma(n)ne v(m)me sunderghes vordenstes wyllen den herberent moltzan vn(de) syne vedderen vnser / Statt dycke vn(de) vaken ghedan hebben vn(de) noch mer don moghen an thokame(n)den tyden ghu(n)nen Herbernt moltzan / vnde syne(n) nakomelynghen dat se moghen buvuͮen tho der voghedenhagen huͦse so vele en den noth vn(de) lust ys me(n) / se scholen bouͮen der erden gheclemet effte an holtvuerk ghemuͦrt syn Wy ghu(n)nen ock vmme sundergher bede wille(n) / desser vorscreuen heren vnde frunde vnde deghedynghes lude dat de kerker mach grauͮen vmme syne huse / effte syne nakomelynghe eynen grauͮen van twyntych vote wyth neddene by dem water(e) vn(de) dat water leyde(n) / vt vnseme stovue dyke dar suluest an dem grauͮen Wy ghuͮnnen ock deme suluͮen Herberent moltzan v(n)sem(e) kerckere(n) vnde syne nakomelynghen wen se suluen personliken hus holden tho dem Sunde effte tho den / Voghedehagen de vyskerye an beyden stovuedyken dar suluest tho der voghedehagen he der suluen vyskerye / mach bruken lyke vns tho syner tafelen vnde kehoff so se herberent tho voren ghebruͦket hefft hyr mede / scholen alle sake se synt wodane se synt vnde alle vnvuͮylle mede ghescleten syn Des to merer tuchnytze / vnde nasporynghe hebben wy borgemester vn(de) Ratma(n)ne tho dem Stralsunde vnser stath Secrett myt wytschop henghen heten nedden an dessen breff dede gheuen vnde screuen ys tho dem Sunde na der bort / Ch(rist)us dusent ver hundert jar dar na an deme twevndeueftighesten jar des mandages na dem sundage / mytuasten als me synghet in der hilligen kerken letare iherusalem