Jk claws kuͮlpe mẏt mẏnen rech(ten) erfnamen bekenne vn(de) betuͮghe openba(r)e in desseme Jeghenwordig(en) breue vor / alsweme dat ik hebbe vorkoft vn(de) vorlaten vor kope vn(de) late to eneme ewighen rechten koften kope deme besche/denen ma(n)ne hinrike van dem berghe vn(de) sẏnen rechten erfnamen vor eẏne(n) su(m)men pen(nin)g(en) den ik to myn(er) noge / van em entfanghen vn(de) vp ghebort hebbe vor der makynghe desses breues my(n) dorp to(m) sysdemytze in deme be/vloten lande to rugghen belegen vp jasmunde in deme kerspel to babbẏn vn(de) den broch to babbin mẏt alle / sẏner to behoringhe alse dat dorp vn(de) kruch nu ligghen vn(de) van oldinghes gheleghen hebben bẏnnen alle / ere(n) scheẏden vn(de) enden endelyken begrepen mẏt akkere ghebuwet vn(de) vnghebuwet myt wyssche myt weide / mẏt toruͮe mẏt mure mẏt holte mẏt bussche mẏt struͮke mẏt wat(er)e vletende vn(de) stande mẏt weghe mẏt steghe / myt richte mẏt denste myt dem hoghesten vn(de) sydesten rechte to richtende an hals vn(de) an hant vn(de) mẏt aller vrig=/heit vn(de) rechticheit alse vrẏg alse mẏne olderen vore vn(de) ik na alder vrẏghest vn(de) hoghest ghe hat bruket vnde / beseten hebben mẏt aller nut vn(de) vruͮcht de dar nuͮ ane is vn(de) noch ane werden mach in tokomenden tiden vn(de) dar / nicht ane vt ghenomen dat sy benomet edd(er) vnbenomet dat cleyne noch dat grote also ganz vn(de) also degher / dat ik noch mẏne erfnamen an deme vorben(omeden) dorpe vn(de) kroghe [...] myne eruͮen / hinrike vn(de) synen erue(n) dyt vorben(omede) gud vrẏghen vn(de) en [...] alle plicht vn(de) [...] heren denst vn(de) vor alle / an sprake vn(de) bewernẏsse(n) gheistlyker vn(de) wertlyker p(er)sonen de recht gheuen vn(de) recht nemen willen vn(de) he mach dyt gud / vor kopen vor setten vor buten vor gheuen vor anderen vn(de) keren in gheistlyke efte in wertlyke achte gantz efte ey(n) del / weme he wil vn(de) deme efte den schal ik vn(de) wil alle stucke vn(de) artikele holden alse desse breff vth wyset vn(de) jnne holt vn(de) / ik schal em dẏt vorben(omede) gud dorp vn(de) kroch vorlaten vor weme ik des van rechtes weghen plichtich bin to vorlatende / vn(de) waren em na der vorlatinghe vn(de) vom alse in deme lande ey(n) recht ẏs vn(de) wẏsen en in eyne myne vredesame besitting(e) / mẏt kraft desses breuͮes Alle desse vorscre(ue)n stuͮcke vn(de) artikele loue ik Claws kulpe myt myne(n) rechten erfnamen hin=/ryke vorscre(ue)n vn(de) synen rechten erfnamen jn guden truwen vn(de) in gantzer warheit stede vaste uol to holdende alse hir / vorscre(ue)n steit To groter bewaringhe vn(de) merer bekantnisse aller desser vorscre(ue)n dink so hebbe ik Claus vorbe(nome)t myn / Jnghezeghel mẏt willen vn(de) wetenheit vor my vn(de) myne erue(n) ghehenghet an dessen breff hir hebben an vn(de) ouͮer ge=/wesen desse erbaren ma(n)nes alse her Nicolaus haghedorn Ratman hinrik van vnna vn(de) gherwin van hern Borgh(er)e tom / sunde de v(m)me bede willen ere Jnghezeghele nien to tughe vn(de) to witlicheit mede hebben ghehenghet an dessen breff / de gheuen vn(de) ghescr(eue)n is tom Sunde na god(es) bort vertey(n)hundert jar dar na in deme drevndefeftighesten Jare / an pinxteauͮende der erbaren hilghen tijt .