Ik heẏse kurlebeke borg(er) tom(e) Sunde vor mẏ vn(de) mẏne erue(n) Bekenne vn(de) betuge apenbare in desseme brefe vor / alsweme dat is mit rade vulbort vn(de) tolate mẏner eeliken husfrowen Taleken vnser beẏden erue(n) vn(de) erer / vru(n)d hebbe rechtliken vn(de) reddelken vorkoft vn(de) vorlaten vor kope vn(de) late jege(n)wardich in kraft desses / brefes Den vorsichtigen ma(n)nen he(n)ningk sluter vn(de) nateldorn borgere(n) dar sulues Vorstendere(n) vn(de) schaffe(re)n / des altares dat dar horet to vns(er) leue(n) vrowen broderscop des dudeschen kopma(n)s to Samershafen in de(n)/nemarken vn(de) ere(n) nakomelingen vorstenderen dessuluen altares Welke(r) altar belege(n) is in vns(er) leue(n) vrowe(n) kerke(n) tom(e) Sunde in der Norder sẏden vor deme lijkhuse vn(de) deme geistlike(n) p(er)sone(n) Nicolao wulfe deme / dat sulue altaͤr mit sẏnen tobehoringen va(n) den sulue(n) erben(omeden) vorstenderen vorlenet is vn(de) den jenne(n) den na / eme datsulue altare van den sulue(n) vorstendere(n) ofte ere(n) nakomelinge(n) vorlenet wert Vor hundert mark / sundescher pe(n)ninge de my to mẏner nuͦge wolbereth sint vor der makinge desses brefes achte m(a)rk / geldes jarliker vpboringe dede Nicolaus wulf mit sẏnen nakomelingen alse vorscr(euen) is hebben vn(de) / vpboren scholen to veer tiden in deme jare vte mẏne verde parthuses vn(de) sẏner tobehoringe belege(n) / in der vrankenstrate dar vormals olde Candelin Jnne gewonet hadde vn(de) nuͦ tor tijd sulue(n) jnne wonet / na vthwisinge der stad bok dar ik eme dat also hebbe scriue(n) laten Alse nu to Sunte Michels dage / negest tokome(n)de twe mark vn(de) denne vort to enem jsliken navolgenden verndel jares twe m(a)rk / Alle de wẏle dat ik desse vorscre(ue)n hundert mark vnder mẏ stande hebbe , We(re)t ok sake dat en desse / re(n)the vn(de) jarlikes boringhe vppe de vorscre(ue)n tide to danke nicht enworde So heft Nicola(us) wulf / vorben(omede) vn(de) sẏne nakomelinge deme dat altar also vorscre(ue)n is also vorlenet wert vulko(m)men macht so / vaken(e) en des not vn(de) behuff is de vͤt to pandende vthe desseme vorben(omede) veͤrde part huses vn(de) sẏner / tobehoringen vn(de) mit den pande(n) to donde vn(de) varende alse hure vn(de) pacht recht is Vn(de) wurde en hijr / borst edder broke bouͮen dat schal ik mẏne erue(n) vn(de) mẏn(er) husfrowen erue(n) vuͮl to don Jodoch v(m)me su(n)d(e)ger / gunst vn(de) vru(n)tschop willen so gheue(n) se mẏ vn(de) vnse(n) erue(n) mit ere(n) nakomelinge(n) de wedderkopp / dess(er) vorscre(ue)n achte mark geld(es) wanne(re) wij sulue(n) wille(n) jodoch wanne(re) wij dat don wille(n) so schole / wij en ey(n) Veerndeel jares touore(n) toseege(n) , Dar na wanne(re) dat verndeͤl jares der toseeghinge v(m)me / kome(n) is so schole wij vn(de) willen en weddergheue(n) ere hundert mark sund(esch) houetstoles mit aller / nastanden renthe vn(de) de sik denne boren mach in ene(n) Su(m)me(n) bẏnne(n) der Stad tom(e) Sunde sunder / jenig(er)leẏe vortoch ofte jeghentseeghent Alle vorscre(ue)n artikele vn(de) jewelk stucke bẏ sik loue ik / heẏse kurlebeke vorben(omede) mit mẏner vorben(omeden) husfrowen vn(de) vns(er) twẏer erue(n) dem(e) vorben(omeden) he(n)ningk / Slut(er) vn(de) heẏne(n) nateldorne(n) Alse vorstenderen vn(de) leenhere(n) des vorscre(uene)n altares vn(de) ere(n) nakome/lingen der sulue(n) macht tor tijt wese(n)de vn(de) Nicolao wulfe alse eneme vica(r)io dessulue(n) altares vn(de) / sẏne(n) navolgere(n) de dat altar(e) vorscre(ue)n also vorlenet wert alse vorscr(euen) is jn gude(n) truwe(n) stede / vn(de) vast wol to holdende sunder alle argelist hulperede ofte weddersprake geistlikes ofte w(er)likes / rechtes To groter vorwaringe vn(de) merer bekantnisse alle desser vorscre(uenen) dink So hebbe ik my(n) / jnges(egele) vor mẏ vn(de) mẏne erue(n) vor mẏne husfrowen vn(de) ere(n) erue(n) witliken gehenghet an desse(n) / breff , den mede tor witlicheit alse mechtige tuge v(m)me mẏne bede willen mede besegelt hebbe(n) / de Ersame(n) Ma(n)ne alse h(er) Eenwolt molre Radma(n) tom(e) Su(n)de vn(de) Merten hoẏer boseten(e) borger / dar suluest Scheen na godes bort alseme(n) veerteẏnhundert vn(de) vijfvn(de)veftich jare des negeste(n) / vrijdages vor Sunte viti dage des hillighen mertelers