Jk he(n)nik van d(er) osten to bussenisse mẏt myne(n) erue(n) Bekenne vn(de) betuge apenbar in dessem(e) breue vor alsweme Dat / ik recht vn(de) reddelken hebbe vorkoft to eneme stede(n) vasten kofte(n) kope Den vorstendere(n) der arme(n) scholre broder schop in / sunte yacopes kerke tom(e) sunde als(e) Conrado osterma(n)ne hema(n)no houede p(re)stere(n) arnd mume vn(de) herme(n) plogema(n)ne / leygen vn(de) ere(n) nakamelinge(n) vor veftich mark sundesch(er) pe(n)ninge deik va(n) en to myn(er) vulle(n) nüghe entfangen hebbe al / er der makinge desses breues dre mark geld(es) yarliker pacht de de erb(are)n vorstende(re) myd ere(n) nakomelinge(n) alle jar vpp / sunte mertens dach scholen hebbe(n) vn(de) vppboren jn vn(de) vth laurens sernten haue tor vnrouwe belegen y(m)me kerspe/le to gynxste vn(de) vth alle dessulue(n) haues tobehoringen alse denn licht vn(de) von oldinges vth gelege(n) heft bynne(n) alle syne(n) / maten enden vn(de) scheden entliken begrepe(n) myt ackeren wische(n) weyden toruen moren holtinge(n) wateringe(n) myd / aller vrygheit herlicheit vn(de) rechticheit myt alleme richte vn(de) rechte deme hogesten vn(de) sydesten torichtende in hals / vn(de) in hand dar to myd aller vrucht vn(de) nüth de dar nu ane is vn(de) nach ane werden mach in alle(n) tokomende(n) tyden / vn(de) sychtes myt allen anderen tobehoringen benomet vn(de) vnbe(nome)t so qwyt vn(de) vryg alse ik de vorscre(ue)n pacht yo hogest / vrygest vn(de) eygenst gehat bruket vn(de) beseten hebbe De ik en ok vryg vn(de) qwyt wil vorlaten wor vn(de) wanner se my / dar to esschen vn(de) entfrygen vn(de) entweren vor alle plicht vn(de) vnplicht dar to vor here(n)denst vor alle ansprake vn(de) be/wernisse aller p(er)sonen de vor recht kame(n) recht geue(n) vn(de) neme(n) wille(n) Dar to myd vullermacht der sulue(n) pacht pandy(n)ge / in deme vorscreue(ne)n haüe vn(de) alle synen tobehoringe(n) so dycke vn(de) vakene(n) en des nod vn(de) behuff werdet donde vn(de) de pande / toulotende touorende vn(de) todryuende wor se willen vn(de) dar mede varen als(e) pacht recht is sund(er) wedderstal va(n) jema(n)de / Se mogen ok de vorscre(ue)n pacht vor veftich m(a)r(k) sund(escher) vorstan vorkopen vorbuten vorsetten vorpanden vn(de) vorande/ren wor se willen vn(de) toweme se de also voranderen dem(e) schal ik vn(de) wil myd myne(n) eruen holden als(e) desse breff jnholt / vn(de) vthwẏseth Jodoch v(m)me sunderg(er) vruntschop willen so geue(n) de erben(omeden) vorstendere myt eren nakomelinge(n) my vn(de) mynen erue(n) den ewigen wedderkop desser vorscr(euenen) pacht vor de(n) erben(omeden) houetsu(m)men Men wanner wy dat don wil/len so scal ik efte myne erue(n) den erben(omeden) vorstendere(n) efte ere(n) nakomelinge(n) vp ene(n) sunte joh(ann)es baptiste(n) dach to mydde(n)somer(e) / touoren toseggen vn(de) geue(n) en denne des negeste(n) nauolgende(n) sunte merte(n)s dage rede wedder Sosteyen gude rinss(scher) guld(en) / vn(de) twevndedortich schillinge sund(escher) myt Der pacht de sik denne behoret vn(de) noth alle nastellich is tosame(n)de in enem(e) / su(m)men ane lenger vortoch dar to sunder alle eren hinder vn(de) schaden Dit alle vorscre(ue)n laue ik he(n)nink va(n) der osten myt / mynen erue(n) vnde truwen leuen vorben(omeden) medelouere(n) alze wedeghe van der osten to tübesse baltes va(n) der osten my(n) / broder wonaftich tor vnrouwe vn(de) he(n)nink van der osten to luffenisse wy vorscre(uene)n loue(re) lauen alle same(n)tliken myt / vnsem(e) erben(omeden) houetma(n)ne myt ener samende hant en vor alle den erben(omeden) p(ro)cu(r)atorib(us) vn(de) ere(n) nakomelinge(n) jn gude / truwe(n) vn(de) sekere(n) loue(n) stede vn(de) vast wol toholdende sunder alle arch efte argelist Des to groterem loue(n) hebben wy / alle vorscre(uene)n vnse jnges(egele) witliken vor dessen breff gehenget Na gades bort viiijc vn(de) envndenegentich ẏar / des negesten sonnauendes na sunte fabyanus vn(de) sebastianus daghe der hilgen twyger mertelere