Jn gad(es) name(n) amen So bekenne wy old(er)manne d(er) reme(n)snyde(re) tom / sunde genomet jochim lang(er)uelt bertolt bertold(es) reymer wytte iachim / tangelman dat de w(e)rdige h(e)r her ẏurge(n) suleke prest(er) gade to laue / to ere(n) heft gegeue(n) to vnseme altare beleg(e)n in su(n)te niclay kerke / synen garden myd d(er) borch vn(de) alle er(e)r tobehoringe(n) belege(n) vp dem(e) / reperberge by d(er) schroder huse myd d(er) renthe de dar yarlikes va(n) ku(m)pt / vn(de) C mark sund(esch) de wy va(n) em entfangen vn(de) ongelecht hebbe(n) na / syner bade vn(de) beger(e) na lude synes vorsegelde(n) breues den he / vns hir vp gegeue(n) vn(de) vorsegelt heft Desse vorb(e)n(omede) hüre myd d(er) renthe / van den hundert marken schal her yurge(n) erbe(nome)t alle jar suluen / personnen vpboren alle de wile he leuet vn(de) holde(n) dar vor alle weke ene mysse na lude synes breues sund(er) yegensegge(n)t Sche/get au(er) dar got vor sy dat intokamend(en) tyden in dem(e) houet/stole vn(de) renthe borst efte broke wurde den schaden schal her / yurg(e)n erbe(nome)t gelik vns hebben vn(de) dreghen vortmer als(e) wy / denne v(m)me sunderg(er) vru(n)tschop willen heren jurgen tosecht hebbe(n) / vnse altar dat schal he beholde(n) alle de wile he leuet vn(de) nu(m)ment / schal ene dar va(n) atsetten sund(er) weret sake dat he beüylle myt / krankheyt als dat he dat ergedachte altar nicht belesen kunde / gelik syne(n) anderen ku(m)panen so schal he enen andere(n) p(re)ster / in syne stede schikken de dat altar belese na wonliker wise edder / wy willen de mysse bestelle(n) vn(de) holden laten vp syne koft vp / dat dar nene vorsumenisse in gad(es) denste sche vn(de) wanner / h(er) yurge(n) myd syner sust(er) erbenomet beyde in got vorstorue(n) / synd Zo is dit vorscre(ue)n lifgedink ok alle mede dat vn(de) wy erben(omede) al/derman(ne) myd vnse(n) nakamelinge(n) schale(n) vn(de) willen dene(n) va(n) dess(es) / vorscre(ue)n liffgeding(es) wegen(e) nu(m)mende wal meͤr plichtich efte / plege wesen Dit alle vorscre(ue)n laue wẏ erben(omede) olderman(ne) myd / vnsen nakamelinge(n) dem(e) erben(omeden) h(er) yurge(n) suleke(n) vn(de) syner sust(er) / in gude(n) truwe(n) vn(de) sekere(n) laue(n) stede vn(de) vast wol to holdende dess(en) / to grotereme laue(n) hebbe wy erben(omede) ald(er)manne alle vnse jnges(egele) / witlike(n) vor dessen breff gehenget Na gad(es) bort XIIIIC vn(de) XCIX / yar in Sunte mathias daghe des hilgen aposteles