Jn deme namen der hilgen vnde der vnghesche=/denen dreualdicheẏt amen . Wi albrecht van der / gnade godes en iuͦnchere van Mekelenborgh , van / stargarden vnde van rostok , bekennen vnde be=/tuͦghen openbare jn desser jeghenwordighen scrift , / dat wi mit vseme goden willen . vmbedwugen na / willen vnde na beheghelicheẏt na rade vnde / na vuͦlborde vnde na hete vses leuen omes Gre=/uen henrikes van Zwerin , vser raathgheuen vser / truwen man vnde sunderliken vser vormuͦndere / den vse leue vader . Her Henrik van mekelenborgh . / deme god gnedich si . vs . vnde vse land bevol in / sime lesten . dor nuͦth vnde dor vromen . vses vnde / vser land , de wi vnde vse leue om . vnde vse / truwen man vnde vse vormundere , vorbenomet / dar an gheprouet hebben vnde gheseen . vsen / leuen Raadmannen . vnde der gantzen stat , vnde / der gantzen menheẏt to der wẏsmer , vorkopht / hebben redeliken vnde rechtleken . vsen hof binnen / der staad to der wẏsmer vor deme Mekelenborgher / dore , also he beleghen is , mit alle sinen stucken de / dar to gheleghet sin , mit deme thorne vnde mit / deme berchvrede vor dusent mark lubeker / penninghe , de vns gantzleke vnde alle vorghul=/den sin Dar to hebben vse leuen ratmanne vs / ghelaten binnen der stat to der wẏsmer to ere / vnde to ghemake vser , vnde vser nakomelinghe . / enen hof . de beleghen is bi sẏnte ivriens kerken / vppe deme orde in dat osten , de vseme leuen vader / hadde to ghehort . de sẏlue hof de scal ewelken / liggen to alleme lꝟbeschem rechte , also de hantues=/tinghe spreken de gheschreuen vnde ghemaket // sin . vnde vse voreldern ghe gheuen hebben ,den / vorbenømeden vsen ratmannen . vnde der gantzen / stat to der wẏsmer , vppe den kop der borgh , vnde / ok ere anderen hantuestinghe spreken de se heb=/ben vppe de sẏluen rechticheẏt . wer dat also , dat / wi den hof . nu vorbenomet , vor gheuen eder / vor anderen wolden . dat schole wi don eneme bor=/ghere to der wismer vnde anders nemende . / desse hantvestinghe schal nicht schaden vnde / nicht breken de hantvestinghe . de vse voreldern / den vorbenomeden vsen Raatmannen , vnde der menen stat to der wẏsmer ghe gheuen hebben . / Mer alle Hantuestinghe . alle vriheẏt vnde alle / rechticheẏt , de en vore ghegheuen sin . van alle / vsen voreldern de love wi in desser scrift na hete / vnde na rade alle vser vormuͦndere , vnde dor / vse guͦt . vnde dor hut vnde vromen vses menen / landes , vor vs vnde vor vseme broder jvncherre / johanne vnde vor vsen nakomelinghen vnbre/kelik ewẏch to holdende . dat alle desse dingh / de hir vor bescreuen sint . gantz vnde vnbreke=/lik bliuen ewelken , so hebbe wi to ener open=/baren betøghinghe vses leuen Omes des vor=/benomeden Greuen hinrikes Jngheseghel / van zwerin mit vseme jngheseghele ghehenget / vor desse ieghenwordighen scripht . desser / dingh sint tøghe de dar over ghewesen hebbet / mit rade vnde mit volbort vse leuen truwen / man , vnde vse vormundere . conradt van / kremon , Jvries hasencop . herman van ørtze , / bolthe hasencop . wẏppert lutzowe . johan van plesse / johan van bvlowe hinrik van barnekowe . ber=/told preen , otte van dewetze , heẏne mandvuel // claus van helpede , godschalk storm , henric / van plesse . eggert neghendanke , riddere , / henneke molteke en knape Desse bref is ghescre=/uen vnde ghegheuen . inder stat to der wẏsmer / jn deme jare na godes bort , Dusent , Drehundert , / Neghenentwinteghesten iare , an deme anderen suͦn=/auende in der vasten .