Jn dem namen der hillighen drevaldicheyt . . Amen . Al den ẏene(n) / den desse ẏeghenwardighe scrift kumpt toͮ seende ofte toͮ hore(n) / de si . witlik . dat wi ratmanne toͮ der wismer , beyde olde vn(de) nye / bekennen openbare an desser ẏeghenwardighen scrift vn(de) bethu/ghen .. dat wi hebben ghelaten den aghbaren herren van dem / dudeschen hus . beschedeliken broder Euerde de eẏn meẏster is / toͮ liflande . vn(de) broder wẏnande deme kummeltvre toͮ Kraukowe / vn(de) eren nakomelinghen . Eẏnen hof an vnser staat toͮ der wis/mer . Eweliken toͮ besittende beholtende vn(de) toͮ besittende mit [...] / danneghem vnderschede vn(de) vorworden alse hir na screuen is / desse hof schal ligghen toͮ allem lubeschen rechte . also de ande/ren moͮneke hoͤue de in vnser staat beleghen sint . beschedeli/ken der moͤneke van doberaan van sunte bernardus orden [...] / van dem cẏsmer van sunte benedictus orden .. In deme scho/len se ofte erer nakomelinghe ẏenich nicht buwen dat der / staat schedelik si ofte erem rechte . Sẏne kappellen in dren / ghe buwete in dem seluen houe . toͮ buwende scholen se vn(de) / ere nakomelinghe buwen na vnsem vn(de) vnser nakome/linghe rade eweliken vn(de) wolbethaghe . wanne se auer mo/ghen hebben van vnsen gnaden ofte vnser nakomelinghe vnd(e) / willen eẏnen kerkhof toͮ der vorbenomeden cappellen . so ne/men se en gherne . vn(de) anders scholen se des nicht hebben vn(de) / en moghen . . Vortmer . Herren , ritter ofte ander personen schol/len se nicht herberghen in dem seluen houe . sunder aleynen / herren vn(de) brodere van erem orden de moten se wol herber/ghen . Vortmer . jn dem seluen Houe schole wesen veer brodere / inne toͮ wonende , vn(de) eẏn kummeltvre . vn(de) nicht mer , de schol/len yo mit vns vn(de) mit vnsen nakomelinghen endrachtich we/sen . vn(de) se scholen och vor vns vn(de) vor vnse staat vn(de) vor vn/se nakomelinghe truweliken arbeẏden vn(de) rẏden dar it mo/ghelik , is toͮ weruende vnse werf vn(de) vnser staat . doch op vnser / staat kost . . Wor de och vnse staat beleghet des ghot nicht / wille . dar scholen se helpe to doͮn also ander begheuene lude de / in vnser staat wonende sẏn .. Vor ander plicht vnser staat / toͮ doͮnde scholen se gheuen ẏowelkes ẏares , toͮ ẏowelkem / sunte mertens daghe . twe mark penninghe lubescher muͦn/te vns vn(de) vnsen nakomelinghen eweliken . so scholen se och / stenbrugghe maken vn(de) betere(n) vmbe den seluen hof ghelike / anderen vnsen borgheren . Och en scholen se nenighen erer na//bure dar toͮ driuen . dat se mit en hogher muren wenne / glindes hoch . . Vortmer scholen se ofte ere nakomelinghe / den seluen hof nemende vorkopen , vorsetten , vorgheuen . / eder an ẏenighen dinghen voranderen . wen alenen vnsen / borgheren mit witschap vn(de) mit volborde vnser vn(de) vnser / nakomelinghe . Vortmer so schole wi vn(de) vnse borghere vn(de) / vnse nakomelinghe sunderlike vordernisse hebben eweliken / van den vorbenomeden broder euerde vn(de) broder wẏnande / vn(de) van eren nakomelinghen . vn(de) van al den ẏenen de dor eren / willen icht doͮn vn(de) laten willen . vn(de) gheuen vns de ghnade / dat wi in allen enden erer lande scholen mit vrede vn(de) mit ghe/make vrẏ bruken sunder ẏenighes mannes hinder vnses / schẏpbrokenen ghodes wor it toͮ lande drẏft . Vortmer so / scholen se efte ere nakomelinghe , binnen vnser staat toͮ der / wismer , eder binnen der staat vrẏheẏt , eder rechticheẏt . ne/ner hande wuͦrde , ofte erue , eder nenerhande acker / ofte ẏnghelt , ofte ghulde kopen , Jt en sy mit vnser , ofte mit vnser nakomelinghe witschap , mit volbort , vn(de) mit / willen .. Vppe dat alle desse wort vn(de) stucke , de hir vore/screuen stat , vast vn(de) stede ewichliken bliuen vn(de) dor / nicht ghe menghe , ofte twiuels an kome , de seluen stucke / vn(de) wort toͮ hinderende , an ẏenighen dinghen . So hebbe wi / ratmanne desse seluen scrift heten scriuen vn(de) maken van / vnser weghene , vn(de) vnser menen borgher vn(de) hebben de=/ghenen , den vorbenomeden broder Euerde vn(de) broder / wẏnande , vn(de) eren nakomelinghen beseghelet mit vn/ser staat ẏngheseghele . Jn dem ẏare na der bort vnses / herren Ghodes Dusent ẏar . Drehundert ẏar . an dem / dritteghesten ẏare . des mitwekens , jn den hilleghen da/ghen toͮ paschen .