Vẏ albrecht van der gnade Godes herre to mekelenborch / to Stargarden vnde to Rozstock bekennet vnde betꝟghet / openbare in dessen breuen . . dat wẏ hebben leflẏken ouer/enghedreghen met vsen truwen raatmannen to der wys/mere . dor der hvlpe willen dar mede se sẏk met gantzen / truwen hebben bewyset jn vsen noden . Do syk vse man / de van plesse beschedelẏken met anderen vsen mannen / vnd ẏren helperen vs to vorderuende weder vs hadden / ghesat . Also were dat van den seluen van plesse efte van / anderen vsen mannen . de sẏk weder vs ghesat hadden / efte van yren helperen , efte van jengheme manne wy / ẏrer weghene na desser tyt , de seluen vse Raatman/ne , efte vse vnde ẏre borghere efte ẏre guͦt wordet / veruangen efte schaden nemen , Dat schole wẏ vnde / wẏllen weder doon vnde ẏn dar af helpen also dat se / jo schadelos dar van schølen blẏuen were wẏ auer / buten landes , zo møghen se dat weder doon sunder jemannes vraghe vnde sunder jeneghen broke . wanne / se vs auer hebben moghen vnde se dar to eeschen . . Zo / schole wẏ ẏn jo dar af helpen dat se schadeloos blẏuen / vnde dar mede so schole wẏ vnde wyllen den seluen / Raatmannan vnde vsen vnde ẏren borgheren to der / wẏsmere en holt vnde gnedẏch herre wesen also vs wol / voghet vnde hoolden alle breue vnde hantueste vnde ster/ken ẏre vrẏheyt vnde ẏre rechtycheyt . also se de hebben / ghehat vnde hebben van vsen elderen vnde van vs / vppe dat alle desse stꝟcke gantz vnde vast blyuen van / vs vnde vsen erfnamen vnde nakomelẏngen So hebbe / wẏ jn ghe gheuen desse breue beseghelet met vseme // jngheseghele In dem iare na der boord vses herren Godes / dusent iar drehundert iar in deme seuen vnde drittighis/teme iare . des mydwekens in den hilleghen daghen to / pẏnkesten . Des syn tꝟghe . de edele man her Gꝟnther / greue to lyndowe her Klawes van helpede . Her otto van / dewetze . Her lyppolt bere . Her Eggerd hardenakke .. / Her vikke van stralendorp Her johan molteke vse riddere / her Johan Todekoghele . her Jvries soutenbek vse raatman/ne van der wẏsmere . vnd andere vele vser man tru=/we werdych