Wi albert van godes gnaden Herthoͮghe toͮ Mekelenborch . greue to zwer(in) . to starg(ard) vnd to Rozstok Here . beke(n)nen vnd betuͦghen openbare in dessem ieghenwardeghen breue . / dat wi mid vsen Eruen schuͦldich sint vnsen leuen truͦwen . Reẏmere van plesse toͮ Barnekowe . Hinrike van buͦlowe to pluszkowe vnd eren rechten Eruen . vẏf / vnd twyntech hundert mark vnd seuen vnd twentech mark lubescher suͦluer pe(n)ninghe Der se vs achteẏnhundert mark rede leghen vnd daen hebben . vnd dre/hundert mark daer se vs vp ghewurnen hebben . also dat vns ghenoghede . in der tẏd de wi volgheden . vsen vruͦnden Den holzsten heren . vnd veer hundert / mark vnd seue(n) vnd achtentech mark . de se mid vsen manen van vseme here in der tẏd vnd in der suͦluen reẏse der holzsten heren bi vs in vseme denste vor/tereden . vp sineme vnd vpp ere verteren . vnd anders waer vpp deme watere daer wi en vor ghesat hebben vnd laten setten vnd laten in dessem ieghenwardeghe(n) / breue wẏttenborch . hvvs . stad . vnd land id haghenowe . vor en pand . also als id licht in siner schede . vnd als id van oldinghes gheleghen heft . mid alle sine(n) / tobehornde(n) . mid aller nvt . rechte . broke bede deenste schote malen . mid alleme rechte hoghesten vnd sydesten . vnd mid aller vrẏheit . als id van oldinghes / gẏ vrẏest ghewesen heft . dat vse daer an wedder los werden mach welker leẏe wẏs dat dat gescheghe vnd mid aller vrucht . vnd scolen daer nicht inne behol=/den . men [...hop] . kerkleen vnd orsedden se . . vortmer schal wẏttenborch bliuen vnd wesen vse vnd vser Eruen opene slot . to al vsen nvͦden vnd noeden . Ok / scolen se dit ghanze pand holden sunder rekenschop . Ok moghen se eder ere Eruen dit pand nẏcht vorbreken eder vorwerken ieghen vns eder vse Erue(n) . iene/gherliye wys . men de vrucht . vnd de rente scal en bruͦkelik volghen . Waer se deleuest hebben willen . Ok scole wi edder vse Erue(n) neneme ma(n)ne ichtes vorbreue(n) . / [...] eder vorlenen in dessen stuͦcken de wi en sat vnd vorpandet hebben . na desser breue lude de wẏle id ere pand is . Ok scole wi vnd willen dit pand als / wẏttenborch hvvs . stad vnd land . vnd haghenowe eder vse Erue(n) . en vrẏen van aller ansprake van al den genen . de vor recht komen willen . recht ghe/uen vnd nemen willen . Vortmer scale wi eder vse Eruen . de vorbenomeden Reẏmere . hinrike . vnd ere Eruen . nicht setten van dessem vorbenomede(n) pande / [...] hebben en wedergheuen . de vorscreue(ne)n su(m)men . alse vẏf vnd twẏntech hundert mark . vnd seuen vnd achtentech mark lubescher suͦluer pe(n)ninghe . ghanzliken / in ener su(m)men . vnd scolen se to ghoͮde bereden . to lubeke . to der wẏsmer . eder to buͦtzowe . In welker desser stede . so se leuest entphaen willen . vnd scolen / der [...] vnd den genen . de de beredinghe entfaen scholen . de se daer tho senden . twe maent leẏde schaffen . dat se de bruͦkelken voren moghen . war se wille(n) . / vortmer wes se losen . eder ere Eruen in der voghedie to wẏttenborch vnd tho haghenowe na vseme eder vser Eruen raede . des daer inne vorsat is . dat scolen se / [...] vp de voghedie to wittenborch hvvs . stad vnd land . vnd upp haghenowe . vnd scholen en dat weder gheuen . mẏd der houet su(m)men . daer en de suͦlue voghe/die vorsteẏt also als wi en dat vorbreue(n) hebben . Vortmer wes wi maken an ghuͦlde . in der voghedie to wittenborch . dat scolen se daer tho beholden . / vnd scyllen en daer to behulpen wesen . dar se dat bruͦkelken besitten . de wẏle id ere pand is . Ok scole wi en schaffen der raetma(n)ne bref van wẏttenborch / dat se sik scolen an se holden . vnd nicht van en keren . wi eder vse Eruen . en hebben en weder gheuen . de vorscreuene(n) su(m)men . der pe(n)ninghe . tho ghede / ghanzliken in ener su(m)men . als hir vor screuen is . Ok scole wi de borchma(n)ne vnd de raetma(n)ne to wẏttenborch an se wẏsen . dat se sik scolen an se holde(n) / als en pand alse vorscreuen is . were id dat god vorbede . dat dit vorbenomede pand . als wẏttenborch . hws . stad vnd land . vnd haghenowe . en af ghe/wi(n)nen . eder af ghedrunghen worde . ed(e)r ienegherleẏe wẏs af ghinghe . de wẏle id ere pand is . so scole wi id en io weder schippen . binnen deme ersten iaer / vnd daghe daer na . dat id en af gheẏt . kunde wi des nicht doen . so scole wi na seghhende . twẏer vser raetgheuen . de wi daer tho setten . vnd twẏer erer / vruͦnd(e) de se daer tho setten . en andere pande daer vore setten . eder ere reden pe(n)ninghe bereden vnd ghelden . to tẏden vnd in steden als de vore seghen / alle desse vorscreuenen stuͦcke . stede vnd vast tho holdende . loue wi mid vsen Eruen . den vorbenomeden Reẏmere vnd hinrike . vnd eren erue(n) Jn ghoden / truͦwen in desseme breue . dan wi tho groterer bekantnisse beseghelt hebben gheuen tweualdich . mid vseme groten Jngheseghele . jn aller wẏse als vor vnd / id ghescreuen is . der en deme anderen nenerleẏe wẏs hinderlik wesen schal . de gheuen sint tho der wẏsmer . na godes bord druͦtteinhundert iar / in deme neghen vnd vẏfteghesten iare des soͮndaghes in der vasten als men singht . Letare jerusalem . Tughe sint vnse leuen truͦwen hinrik van / stralendorpe riddere . bertram bere vse kenceler vicke van buͦlowe diderik veregghede . knapen . vnd vele anderer luͦde de truͦwe wer/dich sint .