Vor alle den ienen de dessen bref seen vnd horen lesen Ik Gosscalc preen tome steenhuse / bekenne openbar vnd(e) betughe in desseme yeghenvardighen breue . Dat ik rechte vnd(e) reddeliken hebbe / vorkoft den boschedenen mannen heren borghermesteren Ratmannen to der wysmer meyn / holt dat boleghen is vpe deme velde tome steenhusze bouen der molen by der beke vnd(e) nedde(n) / der beeke alze de ratmanne vnd(e) ik vnder vs scheder vnd(e) delet hebbet alle dat holt dat / bynnen der schede bogrepen is hebbe ik en vorkoft vnd vorkope in dessem breue vor souen / vnd(e) achtentich mark lubesscher pennẏnghe de my to danke wol botalet sẏn . dẏt holt / schalen se af howen laten tusschen twen lootẏden neghest thokomende vnd(e) scolen hebben vrẏge / weghe ẏn vnd(e) vte deme holte vnd(e) vrien boom [?] vaal vn(n)de ok vrige weyde vnd(e) gras eren perden / vnd(e) weret dat ene knechte yeneghen broke deden an deme holte den scolen richten de Ratma(n)ne / vorbenomet . wered ok Dat dar orloghe edder krich worde in den landen Dat god vor heede / dat de Ratmanne dat holt nicht konden af brẏnghen laten so scal ik dat holt heghen alzo / langhe na to howende alze se dat holt van orloghes weghene nicht wech konden brynghen / laten . vortmer weret dat yenich maan ghestlik edder werlik se an deme holte boghere(n) [?] / wolde dar scal ik se afnemen van allen den de vorrecht komen wẏllen vnd(e) recht / gheuen vnd(e) nemen wyllen . Alle desse vorscreuenen stucke loue ik mid mẏner mede/loueren alze mid henneke preene tome gretze vnd(e) mid henneke stralendorpe to goldebee / spreken vnd(e) reden mid vzen eruen den Ratmannen to der wysmer in truͦwen mid / ener sa(m)mender hand stede vnd(e) vast to holdende sunder ẏenegherleẏe hulperede edder / arghelist , Tho tughe desser dẏng hebbe wẏ dre vze ẏngheseghel ghehenghet vor dessen / breef De screuen is to der wẏsmer An den jaren godes Mo ccco in deme lxxvijo / iare des midwekens in der quatertempere vor wẏnachten