Ik Curd parsow Borgher tor wysmar Bekenne vnde betughe apembar Jn dessem breue dat / ik myd mynen Eruen myd vrygen willen vnde wolbedachtem mude hebbe ouergheuen vnde / vorlaten den Ersamen Mannen heren Borgermesteren vnde Radmannen tor wysmar vnde / alle eren nakomelingen de viff marck gheldes de ik vnde myne eruen hadden to Tesmerstorpe / Jn den Eruen vnde houen de besitten vnde buwen Hinrick winter Mathies olderswager vn(de) lucht / de hinrick Johan vn(de) otte brodere gheheten de van der luͤ peter holthusen wandaghes Borger / tor wismar vor vefftich m(a)rk lubesch dar ane vorset vnde vorsegeld hebben Jarlikes Jngheldes / to enem rechten wedde schatte alse de houetbreff dat klarliken vdwyset vnde ik vn(de) myne / Erue(n) hebben dem Rade vorscreue(n) vnde eren nakomelingen myd vrygem willen dar vp ghe / antwerdet den houetbreff dede sprickt vppe desse vorbenomeden vyff marck gheldes jarliker / renthe Jn den erb(e(n(omeden) eruen vnde houen vnde se vnde ere nakomelinge hebben den breff myd / mynem vnde myner eruen vulkomen willen vnde moghen de vorghenorden viff mark gheldes / hebben bruken vnde alle Jar vpboren vnde dar to neten aller stucke vnde artikel alze de houet / breff Jnnehold myd vpboringe myd pandinge vnde myd dem toseggende vnde allen anderen / articulen recht efft he en van worden to worden bynamen to screuen were Also dat ik effte / myne eruen effte nement van vnser wegen vppe den houetsu(m)men edder vppe de vorscreue / Renthe edder bynnen Jarsche renthe nicht meer dar vp saken scholen vnde willen in tokomenden / tijden Alle desse vorscreuen stucke vnde articule loue ik Curd parsow vorb(e)n(omet) myt mynen / eruen dem Rade tor wysmar vnde eren nakomelingen vnde alle den Jennen de dessen breff / hebben myd eren willen ghestlik effte werlik in guden truwen stede vnde vast to holdende / sunder hinder hulperede vnde sunder alle arghelist vnde hebbe des to groter tuchnisse / myn Jnghesegel myd willen vnde witschop hengen laten an dessen breff vnde wij Tideke / Grantzin vnde hans wedeghe Borgere tor wysmar hebben desghelikes to witlicheyt vnse / Jnghesegele v(m)me bede willen mede hengen laten an dessen breff de ghegheuen vnde screuen / is Jn den Jaren vnses heren veerteynhundert Jn dem twevndeuefftigesten Jare Am / vrygdageh vor der he(m)meluard vnses heren /