Hir is ghededinghet vnde eynghedraghen twisschen dem Ersame(n) Hinrick / bremer Rathman to Gustrow van siner vnde sines broder wegen Hans / bremers in god vorstoruen van der eynen , Vnde Mathias rughethin In sinem / namen vn(de) siner moder Alneken eeliken husfrouwen Hans Otthen borgher to / Rostocke van der ander(e)n zide , van wegen aller tosprake vnde mani(n)ghe , de de obgnan(ten) / Mathias vn(de) sin moder , to den vorgnan(ten) Hinricke vnde Hanse broder(e)n vormenden / to hebben(de) van vormu(n)derschopp ofte Testamentz weg(e)n ok enes gulden(en) spannes vnd(e) suluersundes Szo gudt also hundert rinsc(er) gulden , Vnde allent wes see / vndereynander , beth an dessen dagh mochten to samende gehath hebbn Jn aldusz/daner wise , Dat de obgnan(ten) Hinrick bremer dem vorscreu(en) Mathias schal geue(n) / vnd(e) vornoghen , veervndeveftich m(ark) lubesch , huten(e) to daghe So hee em sodann(e) / veervn(de)veftich m(a)r(k) vornogheth vn(de) betaleth heft , vnde Hinrick mach sodan(n) liiij / m(a)r(k) gudes gheldes , Alse hee to Rostocke bij de kemerer(e) gelecht hadde , to des vor/screuen Mathias beste wedder esschen vnde entfangh(e)n , vnd(e) dar schal Mathiasz / ofte sin moder Hinricke nene beweringhe ane doen Ok schall Mathias vnde / sin moder vpp(e) Hinricks esschinghe laten delighen alle scrifte , De Mathias vnde / sin moder hebbn Jn der Stadt boken to Rostocke desse sake belangen(e) Also dat / see Hinricke vnde sinen vn(de) sines broder eruen nicht vorfencklick edder schedelick / zin , Hir vpp de obgnan(te) Mathias vor suck vnde sine moder , heft den vorscreu(en) / Hinrick sine vnde sines broder eruen ghentzliken vorlaten , vn(de) gelauet ene vn(de) / de eruen vorben(omet) hirnamaels der vorscreuen(en) sakehaluen nicht meer antolangen(de) / vnd(e) to mogen(de) dorch suck edder ni(m)mande anders van erer wegen(e) Sunder hir / Dorch schalen see van eyn ghescheiden wesen , vnde alle sake gheendet gedodeth / vnde gelendet wesen Ok schalen beider vorscreu(en) parthe borghen schalen der hal=/uen vurder neen noeth vnde schaden liden , Dith is ghescheen Jn den iar(e)n / vnnses her(e)nn DusentVeerhundert Negentich am Mandaghe vor Judica / vor den Ersamen her(e)nn Johan hoppenacken Berndt peghell vn(de) gerdt lost / Borg(er)mester(e)n Her Hermen mo(n)nick Her Vicko Sassen vnde her Johan bantz/kouwen Rathmann(e) Vor tughe sint hir bij gewesen de beschedenn(en) Hans / lutkehenneke Hinrick becker vnnde Jurgen eexen Erffsetenn(en) borg(er) tor wismer /