Allen vnde enem iszlik(e)nn de dessen vnnsen breeff seen edder hor(e)nn lesen , watterleie staits eer(en) vnnd(e) werdicheith de sinth , Vnnsen holden leuen her(e)nn / vnde bisunder(e)nn guden frunden Doen wij Borghermester(e) vnde Rathmann(e) der Stad wiszmer , nach denstliker vnde fruntliker grute , enem(e) Iewelik(e)n / na gebaer(en) witlick vnde apenbaer(e) betughenn , Dat hutenn(e) vpp(e) data van dessen vor vns sint gewesen Thoniges schacht eyn voer man vnse borgher vn(de) / Hans sin sone clegheliken claghen(de) , so see vorheen mer maelsz ok hedden gedaen , wo etlike stratenrower(e) dem(e) obgnan(ten) Hans schachte vpp(e) der vrijen / heer(e)strate twisschen Dertzouw vn(de) der Mertensmolen , Jn dem iar(e) so men schreeff Dusenthveerhunderthtwevnd(e)neghentigh veer weken vor Vastellauende / hadden vth sijnem(e) thouwe gespa(n)nen , dree perde , des vorscreu(e)n Hans Vader(e) Tonigesze tobehorende , dat eyne perth was grauw Ingekofft vor achte r(insche) / ghulden , dat ander was bruͤn vor eluen m(a)r(k) , dat drudde ok grauw gekofft vor veer rinsc(he) g(ulden) , Vnde to der suluen tid dem vorscreu(en) Hanse ok wer(e) gena=/men worden van den suluen stratenrouer(e)n , sine tassche van der sijde , mit dreen gude m(a)r(k) , dar manck weren twe poste gulden , Desse vorscreu(e)n vader vn(de) / sone clagheden ok vm der , Iw [?] in dem(e) suluen iar(e) vorb(e)n(omeden) , veertheyn dage vor winachten , Ene an(dern) maelsz vpp(e) der koningliken vrijenstrate twissch(e)n Dertzouw / vnde der Mertensmalen , wurden weldichliken gename(n) twe perde , dat ene was bruͤn vor theeyn m(a)r(k) , dat ander ghrauw vor Neghen rinsc(he) g(ulden) ingekofft / vn(de) dar to dem(e) vader(e) sine tassche mit twen m(a)r(k) gheld(es) , vn(de) dem sone vorgnan(t) ok sine tassche mit dreen m(a)r(k) gheld(es) Alsodann(e) berouÿnghe vnnd(e) / benemy(n)ghe wo vorbena(n)t isz , Dat de en also in dem(e) iar(e) , tid vn(de) stede sij bescheen , vn(de) der vijff perde vnde sulk vorscreu(e)n gelt sint qwith gheworden , / hebben see vn(de) eyn(e) Iewelick van en na ey(n)ander mit vthgestreckeden armen vn(de) vpgerichteden vingher(e)n gestaueder eede liffliken to gade vnd(e) den / hillighen geswar(e)nn vn(de) gesecht , dat er(e) claghe vorbeste(m)meth recht vn(de) waer(e) sij , woru(m)me hebbn wij v(m)me eret beider bede , in getuchnisse sodaner / claghe vnnd(e) eede , vnnser Stad Secret(um) witliken laten hengh(e)nn benedenn an dessen breeff Gheuen vnnd(e) schreuen in den Iaer(e)n vnns her(e)nn / Dusenth Veerhunderth Dreevnnd(e) Neghentigh an dem(e) Mandaghe na der Hilligh(e)nn Dreeualdicheith daghe /