Mẏnen denst mit vormoge alles guden . Erszamen vnnd vorsichtigen heren vnd(e) / guden frunde . sunder tweuel js Jw wol bewust . Ick In der vasten nelikest / vorghangen . mit todade Curdt Sperlinges van weghen mẏnes ma(n)nes hans / Bussen . de mẏ sunder wetent vnd(e) willen enttaghen . vnd(e) In Iuwer Stadt / sick entholdende is vorhandelinge hadden . dar sulues denne In Iuw(er) Ieghen/wardicheit wart bededinget vnd(e) bespraken . dat de sulue hans busse twissche(n) / der tijdt vnd(e) palmen sondage . mẏn erue wedder besetten , ofte darsulues / wedder üp theen scholde deme noch so nicht geschen is welk he mẏ doch / dorch Brant Bussen synen Broder . lauen leͤth to holdende , wo dem(e) allen Is / myne flitige Bede , gẏ den genanten Brandt Bussen Iuwen Borgher mẏnen / louer so willen vnderrichten vnde holden he mẏ holde . wo he mẏ vor sinen / broder gelauet hefft , Also dat desulue sin broder sunder lengher thogeringe / mẏn erue dar he wo vorbororet aff getaghen is besette edder sulues wedd(er) / towane dat mher scriuendes derhaluen an Iw ok furder kost vnd(e) theringe / to donde nicht dorff van noden sie , dat wil Ick v(mme) Iw wor Ick kan vnd(e) / mach mit flite g(er)ne vordenen , Bidde des Iuwe richtige bescreuen antwort / bi duss(e)m Ieghenwardigen bade almechtich beuolen . Dat(um) stuke am(me) / auende Inuentio(nis) cruc(is) anno etc(etera) xciiij /

Henneke Ranen