In godes name(n) ame(n) . we ghreue gh(er)rart van der godes ghe naden eyn greue van holtsten vnde van reynoldesb(ur)g greuen / heynrikes sone . vnde we ghreue . Johan van den siluen gnaden eyn ghreue van holsten vnde van plone ghreuen / gh(er)rades sone . be kennen des in desseme breue . dat do vns de stat to deme kyle hulde deden vnde vnse man / worden . do be dachte we maniche stede truwe vnde leue de se dicke hadden ghe dan vnde be wiset vnsen voren / varen vnde olderen . vnde we och hoben dat se bi vns don scholen . vnde gheuen alle de vryghehet ẏn / vnde mach de se van vnsen vore varen hadden hat . vnde dar to gans vnde vri loͮbes reyt also vullen / komen alse de stat to lubeke in binnen heuet . vnde vri to bruͦkende . dar in bouene schole we nynen / torn buͦwen oppe deme hvs to deme kyle . vnde nyne brucke van deme hus vt af slan . vort mer den stat / voghet . den schole we setten mit willen vnde vulle bort des rades to deme kyle vnde se mit vnses vullen / bort vnde de voghet scal wesen . eyn borgher binnen der stat wonaytich . hir en bouen stedeche we / al er hant vestinch vnde alle vriheit de em is che gheuen van al vnsen olderen vnde vore varen / vnde willen se uerchen mede mi(n)nern noch krenke . mer leuer bete(re)n wor we moͮghen . oppe dat alle / desse vore sprokene dinch stede bliuen vnde vntho broken . so hebbe we vnse ynghesechele henchet / tho desseme breue de is the gheuen . tho deme kile . van godes bort . dusent iar . dre hundert iar / vitheyn iar in alle ghodes hilchendaghen . ouer desen deche ding hebbet wesen . . har heyrik van / aluerstorp . har doso blok har luder van plone . har titlef wlf . har marq(ua)rt ij har wlf van wessense / har witte sten . har Johan van rarm(er)storp de riddere . vnde dar to de ratman har johan van deme haghene / har co(n)rat van b(re)men har Joha(n) boge(n)husen har lutb(er)t . har la(n)ghe volquin vnde andere ratman mit maneche(n) / bederuen mannen