IN nomi(n)e d(o)m(ini) Amen. Wẏ meẏnen Raatma(n)ne der stat to deme kẏle . beke(n)nen vn(de) bethugen openbare . alle den ghene(n) de dessen bref / scolen sehen efte horen lesen Dat wy mit eneme vulborde vnses rades redelike(n) vn(de) ordelike(n) vorkoft hebben heren .Bruͦne van . palborne deme / pristere vn(de) syne(n) rechten Eruen ofte we dessen bref mit sẏme wille(n) heuet . an vnser stat Rente . wor wy se hebbe(n) . Twe . mark gheldes gheheten / wicbelde ghelt . vor . Twe . vnde . dorttich . mark lubesch . de he ghansliken vns betalet heuet to . Luͦbeke . in der stat in lubeschen ghulden . Desse / Twe . mark geldes . scole wẏ alle iare to twen tyden vthgheuen alse to . Paschen de nuͦ neghest an stande is . ene . mark lubesch . vn(de) to suͦnte mich=/aelis daghe . ene . mark lubesch . deme vorbenomde(n) heren . Bruͦne , ofte sẏnen rechten Eruen , ofte sẏme waraftighen boder ofte we dessen bref mit / syme willen heuet to Lubeke in der stat . alse wy eme sine ander Rente pleghen to betalende . vnder vnseme schaden arbeyde , vn(de) koft vruͦnt=/liken vn(de) lefliken suͦnder ienigher leẏghe vortoch nicht to thende vp ienigher leẏghe schaden , de an vallende were vnser stat , an orloghe an / brande an welker wys dat de schade were . Vortmer were dat sake . dat dat vorbenomede ghelt , nicht worde vth ghegheue(n) , to den vorsproken / tẏden ofte dat de hebber desses breues ienighe kost dar vp droghe so scholden wẏ Raatma(n)ne , vn(de) willen eme sẏne(n) witliken schaden weder / vprichten . Vortm(er) were dat sake , dat wy Raatma(n)ne der stat to deme kẏle wolden weder kopen . de . twe . mark gheldes . so scholden wẏ / dem vorsproken heren . Bruͦne , ofte synen rechten Eruen , ofte we dessen bref mit sy̆me willen hadde den weder koop kundighen eyn verden=/deyl iaris to voren vn(de) gheue(n) eme weder . twe . vnde . dorttich . mark lubesch , an lubescheme gholde . Vortm(er) de willekore weder to kopende / steit an vns Raatma(n)nen to deme . kẏle . vn(de) nicht an he(re)n . Bruͦne noch an den den de Rente an vallende were . dar mede scolde he , vnde / syne rechten Eruen ghansliken betalet wesen . To ener openbaren bethuginghe vn(de) vestinghe alle desser vorschreuen dink . so hebbe wẏ / meẏnen Raatma(n)ne to deme . kẏle . vnser stat Ingheseghele an dessen ieghenwardighen bref ghehenghet . Datum Anno domini . Mille=/simo . Tricentesimo . Septuagesimo . Ipso die sancti Mauricij e(t) sociorum eius ,