IN godes namen Amen Vp dat ma(n)nige dinck nicht enscheen De wedder got möchten wesen / vntemelick den luden vnde denne rechte to na Mit vulborde vnde tolatinge vnser Erliken Borger/mestere vnde Radma(n)ne der Stad to deme kyle Sind wẏ Mestere van deme Ammete des schower=/kes dar sulues enes geworden desse Jegenwardegen articule . vnde willekore In vnsem(e) ammete vn/der vnsen denstknapen na rechtuerdegen saken to ewegen tyden beholden vnde besluten .
Wer den wy komen to des Rechtes wyllekore Schulle(n) weten alle de ku(m)pane vnses ammetes / de gnade vnde vrygheyt , der se gunstegen mogen enneten Alle de wyle se erliken syck myt / vns behelpen vnde denen To deme ersten Were dat Jenich va(n) den ku(m)panen kranck . werde So / lange dat he wurde berichtet myt deme Sacrame(n)te der hilgen Olginge So scholen de ersten / tyd de twe mester knapen ouer em de ersten nacht waken Dar na scholen se alle de anderen / de wẏle eme des not is Ouer eme schycken twe andere van den ku(m)panen Vnde den schal de kra(n)/ke alle nacht geuen een stoueken kyler beres Welck va(n) den ku(m)pane(n) dit vorsumede de schal / dat beteren myt vj pe(n)ni(n)gen Eft ock desse vorben(omede) kranke also arm were vnde konde nicht / stan desse kost deme scholde(n) de vorstendere der ghilde doͤn iiij s(chillinge) vd der bussen Were dat eme / des noch vurder vnde mer behuf were Men scholde eme noch iiij schilling(e) don Vnde he schol/de dit gelt vorborgen eft he konde konde he ok neme(n)de hebbe(n) Men scholde eme dat duͮn vppe / syne kledere Were ock dat syne kledere so gud nicht enweren eft dat he nene enhadde So / schal me(n) eme dat v(m)me godes wyllen vnde vnser leue(n) vrouwe(n) togeuen /
Item Eft van de(n) ku(m)pane(n) welck vorstorue so scholen de andern altomale wesen in der vigilie vn(de) / Selemissen by broke vj penni(n)g(e) vnser leuen vrouwe(n) Vnde den also vaken(en) also we van en / steruet schal me(n) nemen vthe deme schappe efte bussen xxx . selemissen vnde laten syner zele / dar na van stunden an vore denken /
Item hebben de ku(m)pane to den Monneken vryge graft It(em) en were eft we besundern de graft / anders wore wolde kesen Vortmere hebben se den vryge lechte van der gilde In der bygraft /
Item hebben de ku(m)pane ene ewege missen In der Monneke kerken de men alle dage holt vor / vnser leuen vrouwen Altare dar men Inne bẏddet vor de kumpane beyde vor de leuendegen / vnde de doden /
Item eft Jenich ku(m)pan were an deme wege vnde were des gantsliken to sẏnne dat he theen / wolde to deme kyle vnde mẏt vns denen an vnsem(e) ammete vnde beuelle an deme wege / Also dat [...] vppe ene halue myle na der Stad de scholde bruken vnde geneten alle / d[er] vrẏgheyt vnde Rechtgcheẏt Also de Jennen de dar hebben gedenet mẏt vns in der Stad / en gans Jare In alle der wẏse also is vorgeschreuen /
Dar na scholen weten de ku(m)pane de stucke dar se mogen ane breken vp dat se syck des so / vele bed mogen bewaren . In deme ersten welk knecht denen wẏl In deme scho Am/mete wan he sytten gheẏt vp de werckstede vnde wo vaken he sẏck vormedet Is he plich/tich twe penni(n)ge to wẏncope de schal men vort keren to der ghẏlde Des sulue(n) gelẏ/kes is plichtich eẏn Islick van den ku(m)panen twe penni(n)g(e) to tẏdghelde alle verendeel Jares / dat men mede keret in de suluen nutticheẏt erer vorschr(euenen) ghylde /
It(em) neen ku(m)pan schal den andern vppnemen van synes Mesters werke bẏ ene(n) p[u]nde wasses / vnser leuen vrouwen vnde den mester knapen bẏ vj penni(n)g(en) /
Item eft eyn ku(m)pan den andern sloge dar scholen bẏkomen de vorstendere der ghylde vnde sche/den dat also se lykest vnde rechtuerdegest konen na vdwẏsinge vnde belegenheyt des vor/brakes wor dat ane schelet vnde keren den broke to vnser leuen vrouwen Id en were dat / id were bluͤdich efte blaw dat richtede den de Rad na deme lubeschen rechte /
Item were Jenich manck en de eneme andern besundere efte nyge namen geue Efte were / wee de in vnsen werck buͤden efte dar vore jenige schamelose eft vnerlike werke Edder / andere dinck dede vnvoͤchlick weren beghinge Se weren belegen wo se belegen weren / de scholde dat beteren vnser leuen vrouwen mit j pund(es) wasses vnde den mester kna/pen mit vj penni(n)g(en) /
Item schal neme(n)t van den ku(m)panen vnderlangen ouen sodane spyl efte werk dat ghelt / wẏnnen efte vorlesen mach Is dat de Mester knapen des ouer komen se scholen en dat / beteren mit vj penni(n)g(en) vnde vnser leuen vrouwen mit j pund(es) wasses