Vnsen fru(n)tliken gruth myt begheringe alles guder(en) touor(e)n Ersamen her(e)n vnnd(e) besundergen leue(n) fru(n)de vns hefft clechtliken / don berichten vnsze leue medeborgher Otte oszbor(e)n togher desses breues wodeme wijs he syne(n) sone in juwe stadt in dat reme(n)snider / ampt to dene(n)de gheschicket hadde de sick denne to eneme juwer borgher(e) ghenomet Hans Schuue vermedet hadde wilkere(n) / myt syne(n) amptes broder(e)n den sulue(n) vnses borghers sone myt smeliken reden desser stadt vnde vnsze(n) ampten ghilden vn(n)d inwoner(e)n / to vorsmaginge schole(n) ghescheen syn van sick vn(n)d dar nicht to denende schole(n) vorwiset hebben sick vordrystende etlike dynge to segge(n)de / de wij billeghe(n) wol scholde(n) vor(e)antworden vurder alsze wij juwe(n) Ersamenheiden(e) vpp dithmael wol konen schriue(n) So desse suluͦe / Otte oszbornn juwe(n) Ersame(n)heiden(e) sodan(e)n vurder wol werth endeckende is hijrv(m)me vnsze andachtighe begher(en)te vn(n)d fru(n)dlike / bede gij beyde parte vorghescreu(en) Intflitigeste wille(n) vorhoren vnnd(e) de(n)ne vns by dessem(e) suluen schrifftliken wille(n) benalen / offte wij vnsze ampte ghilde vn(n)d inwonre wor(e) brocksamych ane werde(n) ghesporet dar v(m)me de vnszen(e) in iuwer(e) Stadt / nicht moghe(n) denen wy wille(n) vns myt vnnszen(n) inwoner(e)n dar richtich vn(n)d boͤrlich inne laten(n) vynden(n) worde(n) denne de ghe=/breke vn(n)d schult by den juwen(n) bevunden(n) gy de suluen(n) dar denne to willen(n) hebben(n) in vormoghe ze sodan(e) vnschonelike / sproke torugge stellen(n) vnnd(e) na juwer kantenysse dar vor doen so sick in dem(e) rechte behoret wy willen vngherne tostade(n) / dat de vnszen vpp(e) juwe Ersamheide(n) vn(n)d juwer ampte vntüchtige(n) scholen spreken(n) wy twifelen ock nicht gy in der beste(n) wyse / dat myth den juwen(n) ok willen(n) affkeren(n) wy bidden(n) ok furder gy dessem(e) vilghenante(n) Otten Oszborn(e)n v(n)nd synem(m) sone vorderlich / in synen(n) richtigen(n) saken(n) offt em(e) des benode(n) sy willen(n) syn wente he hijr vor ene(n) vrame(n) borgher in dem(e) remensnyder ampte / mennich jar gheseten vn(n)d den sulue(n) hans ozsborn(e)n syne(n) sone sodan(e)n ampt sulue(n) hefft gheleret Dessz alles in dat richtigeste to / vorvoghende wille(n) wij myt vnghespardeme vlite juwen(n) Ersame(n)heiden(n) de dem(e) almechtige(n) gode to lange(n) tide(n) syn beualen(e) gudwillige(n) / in enem(e) ghelike(n) offte velem(e) groteren(n) affvordenen(n) Schreu(e)n tom(e) kile des dynxstedages vor laurencij anno (etc.) xcij Vnder(e) / vnszer(e) Stadt Sechret(um) /

Borgermester(e) vn(n)d Radmann(e) / tom(e) kyle