Im(e) Jar(e) twevnnd(e)negentich hefft anghespraken vor dem(e) sittende stole desz / Rades thom(e) Kyle hans Ernst Borgher dar suluest eynen(n) gnant(en) Marquard / Schelen don Inwaner desz landes vemeren dar Jege(n)wardich wesende v(m)me / veervnnd(e)twintich last gersten de em(e) de sulue rechtliken vnnd(e) redeliken / aff ghekofft hadde vnnd(e) dar synen gades peni(n)gh na wonliker wÿse / vp entfangen vppe stede vnnd(e) tyde to leuederende szo se malkander(e) / ens weren gheworden vnnd(e) em(e) vppe sodan(e) tyde vnnd(e) stede den / kop doch nicht gheholden hadde der wegen denne de sulue hans In / merckliken bewyszliken scaden ghekame(n) were welken kop vnnd(e) / eyndracht de gnant(e) marquardt vnbedwunge(n) mydt vryen wille(n) dem(e) / ergescr(euenen) hans vor tugen to ghestan vnnd(e) bekanth hadde szo hans / erbenom(ed) dat vor dem(e) Rade erghedacht mydt vnberuchteden loffwer/dighen tughen rechtesz wÿse ghetugede vnnd(e) war makede vn(n)d vurder / ene vor dem(e) sulue(n) Rade v(m)me sodan(e) gheleden(n) bewÿszliken schaden / den na to kame(n)de anlangede desz worden se in beyden parte(n) na / clage vnnd(e) antwerdt ghewÿset vor erer beyder frundt in tho voginghe / twÿer persone(n) desz Rades erbenom(ed) alsz vruntlike myddeler dar doch / denne de sake vnghescheyden wedder vorwÿset worth vor den Rath / alsz denne hefft vor dem(e) Rade ergescr(euener) irschenen hans Ernst vorbenom(ed) / ansprekende vnnd(e) vragende Marquart vorg(eschreuen) in deme he dar eyn / vth heyensek man wore efft he em(e) ock antwerden wolde vor dem(e) / Rade thom kyle in erem(e) lubesken rechte der erghescr(euenen) sake halue(n) wesz / recht were dar suluest netende vnnd(e) entgeldende desz begherde Marquardt / eyne acht vnnd(e) na besproke antwerdede dat he van hete weghen / Gerdt ghenekoten synes swagers Inwaners desz landes vemer(e)n / sodan(e) korne vorkofft hadde de em(e) dar vullekamen(n) macht tho / gheue(n) hadde dar van he villichte in sodan(e) last kame(n) mochte desz / sprack de erghescr(euene) Gerdt Genekote dar jeghe(n)wardich wesende vnnd(e) / sodan(e) alle an horende vnbedwungen mydt gantzem(m) vryen willen wol / bedachtes modes alsz ydt leeth dat he wolde eyn affnemer wesen / marquardt ergedacht alle der baue(n)berorder sake halue(n) vnnd(e) sick vurder / gaff gantzliken vor dem(e) Rade thom(e) Kyle in ere lubesk recht vnnd(e) // vorboth sick vor dem(e) Rade rechtes to plegende desz korne kopes vnnd(e) / aller vorgescre(uenen) sake haluen dem(e) ergescr(euenen) hansze so hoch alsz de sake rÿsen / mochte allent wesz em(e) vor lubesck recht van dem(e) Rade worde aff / ghesecht desz netende vnnd(e) entgeldende desz ysz dem(e) gnant(en) Gerdt erlick / gelt behindert yn der Stadt thom(e) Kyle desz sulue(n) kopes halue(n) Vp / dat hefft hans ergnant(er) anghespraken den gnant(en) Gerdt alsz eynen / houethman des(ser) sake v(m)me synen(n) gheleden schaden dar denne de gnant(e) / Radt na clage vnnd(e) andtwerde vnnd(e) na besproke hebben aff seggen / laten konde hans erbenom(ed) bewÿsen desz kopes halue(n) scaden desz / mochte he gheneten vppe tyde vnnd(e) rechtdage vth ghesticket dar / denne de gheleden bewÿszlike scade ysz ghetuget vnnd(e) warghemaket / vppe Soue(n)hundert marck lub(esck) desz hefft de Radt ergescr(euen) na clage / vnnd(e) andtwerdt na besproke vnnd(e) Ripem(e) Rade aff seggen laten / dat hans erbenom(ed) sodan(e) behinderde gelt scolde mydt lubeskem(e) rechte / voruolgen vnnd(e) dar(e) synen(n) gheleden scaden ynne soken so hoch alsz / sick dath vorlopen wolde welk he dree vellighe rechtdage na / lubeskem(m) rechte mydt alle voruolget hefft doch dar y(n)ne sick to / beholdende vnüorsumeth offt dat behinderde gelt sick so verne / nicht strecken mochte alsz syn bewyszlike scade rÿsende were / he sodan(e) auer(e) gelt van Gerde mochte den mane(n) mydt rechte / al wor(e) he ene besloge