Anno xcviio des ersten Dinstedages nae den achtedagenn / des hilligen licha(m)mes synt dusse nagescreuen(e) Ordele affgesecht (et cetera) /

De Ersamen vorsichtigenn herenn vnnd(e) geschickeden(n) personen der veer Stede / Kill Itzeho Rendesborch vnnd(e) Oldesloe , bauengescreuen , hebben tusschen(n) deme / duchtigenn Detleff van Bockwolde anclegere , wonnafftich tho der hasselborch im deme / lande to holsten an de enen vnnd(e) dauidt Merseuelt vageder to der Gropnisse antworders / manne an de anderen siden Na clage antworde , Rede wedderrede , Insage bowise , Na / bosprake , irkantnisse vnnd(e) ripem rade , vor recht aff seggen laten kan dauidt / vorbenompt tugen vnnd(e) warmaken myt Erbaren framen bosetenen luden vnnd(e) de / suluen dat furder vor deme Rade to der Gropnisse myt Eden beholden vnnd(e) vorfesten / na lubesschem rechte dat alle dinge zo gegaen vnnd(e) ghescheen syn nae Inholde des / bosegelden breues darvpp getoget vnnd(e) ouergeantwordet mach he geneten Idt ghae / dar furder vm(m)e also recht is hijr vppe hebben beide parte Detleff vnnd(e) Dauidt vorg(enant) / boleuet vor den Steden ene Steken rechtdach des negesten frigdages na Sunte / Johannes dage to Middensamer ere rechte tobosokenn vnnd(e) vorfurderen(n) vor / deme Rade to der Gropnisse Gescreuen van bouele der(n) vorbenompten heren(n) / vnnd(e) personen der veer Stede /

anno xcviio bauengescreuen (et cetera) /

De Ersamen vorsichtigenn herenn vnnd(e) geschickede personen (et cetera) baue(n)genompt / hebben tusschen Clawes guden anclegere an de enen , vnnd(e) junghen Clawes / bulder vnnd(e) Marquardt Schacken antwordes luden an de anderen siden Na clage antworde / Rede , wedderrede insage bowise , na bosprake vnnd(e) irkantnisse myt ripem rade vor recht aff / seggen laten Noch dem(e) male de tuge geuoret vor junghe Clawes bulder vnnd(e) Marquardt / Schacken na vthwisinge dess(es) breues ouergeantwordet vnnd(e) eres vorgeuendes inn(e) / gerichte nicht myt Eden bouestet syn vnnd(e) richtlichen(n) geswaren hebben ere zee / tuchnisse deden , vnnd(e) de tzarte nicht vorsegelt was syn de sulue tuge machtloessz / schadet weme furder vpp(e) de tzarten schall he soken vor dem Rade van Rendesborch / Idt ghae dar furder vm(m)e also recht is Gescreue(n) van bouele de vorgescreuen(n) heren(n) (et cetera) /

anno xcviio bauengescreuen(e)n (et cetera) /

De Ersamenn vorsichtigenn herenn vnnd(e) geschickeden(n) personenn (et cetera) / bauenberort , hebben tusschen hinr(ik) badendorpp vnnd(e) Clawes Moluer(e) / anclegere vppe de enen , vnnd(e) Lemmeke Nortman vnnd(e) Mathias kegell , / an de anderen siden Nae vnderrichtinge vnnd(e) seggende , der bomelten Hinr(ik) / badendorpp vnnd(e) Clawes Moluer(e) aff seggen laten , Isset sake dat beydenn / parten een Steke recht dach alzo se vorgegeuen vnnd(e) gesecht hebben , vnnd(e) / dat bowisen konen , wen dess(es) van noden is , gelecht is vnnd(e) vortekent / schall ere wedderpart nedderfellich syn zo hoghe alzo se in lubesschem(e) rechte / geschuldiget syn Idt ghae dar furder vm(m)e alzo recht is Gescreuenn / van bouele der vorbenompten herenn (et cetera) /

Georgius Lutzenborch / Secretarius Kilouen(e) s(creuen)