In godes namen Amen . Wẏ hinrik van der osten Rydder wonende uͦppe deme huͦse thuͦ plote bekennen vnde bethughen / openbare vor al de ienen de desse ieghenwardighe scrift seen oder horen . Dat wi van vser vnde vser erfnamen weghen / vorkoft hebben vnde vorkopen an desser ieghenwardighen scrift . wares rechten . Redeliken kopes . den armen luͦden / de in des hilgengestes huͦse sint in der stat thuͦ Colberghe vnde eren vormuͦnderen . ieghewardich . vnde thokomen=/de . verundetwintich mark pennynghe ewigher rente . up thoborende hir negest alle iar . vte deme dorpe tor spie / vnde van den houen de dartho lighen . vor druͦddehalf huͦndert mark wonliker pennẏnghe . De vns mit reden pen/nynghen betalet sẏn . vnde an vse vnde vser erfnamen Nutte behof komen sin . alse inbetalinghe vser sculde / vnde hebben vor koft vnde vor kopen dit vor nomede dorp vnde rente . vng(eroret) alles denstes bede . vnde muͦntepennynghe / vnder aller vnplicht . mit alleme rechte . hogestes vnde mynnestes . alse hals vnde hant . vnde alles anderen rechtes . mit / wische . weyde . ackere buͦwet . vnde vnghebuͦwet . mit wolden . buͦschen . bruͦken. torue . wateren water vluͦt . vischerie / molen . vnde molen rente . mit krughen alrede buwet vnde deme noch buͦwen mach . vnde mit aller rechtycheit / vrucht vnde nuͦt . vnde mit alleme dat dar af komen mach . Alse dat suͦlue dorp . an synen sceiden vnde enden / heft begrepen . vnde alse it tho vns komen is van vsen olderen . tho warende iar vnde dach vor alle ansprake / alse en lantrecht is . were ouer dat vse here van Camẏn . dit suͦlue dorp . mit synen houen . vnde desse vorbenuͦ=/mede rente den vorsprokenen armen luͦden oder eren vormuͦnderen . nicht vorlaten wolde . so scuͦle wi en dat / leen na holden to truwer hant . were ok dat wi vorstoruen . so scuͦlen vse erfnamen den vorbenuͦmeden armen / luͦden vnde eren vormuͦnderen . ieghenwardigh vnde tho komende , de lenware na holden tho truwer hant alse lan/ghe dat vse here en dit dorp . vnde desse rente het . vppe dat alle desse vorsprokene dynk vnde stukke . vnde en eslyk / truweliken stede . vast vnde ganz gheholden werde . Dar sette wi vore tho borghen mit vns . mit samender hant / Hinryk manduͦuele Jacobes sone . vnde ventzeken van Nemer . vnde wi hinrik manduͦuel Jacob manduͦuels / sone . vnde ventzeke van Nemer . bekennen openbare andesser ieghenwardighen scrift dat wi louet hebben vnde / louen dor der bede willen her hinrikes van der osten mit samender hant vnde entruwen den vorsprokenen armen luͦden / vnde eren vormuͦnderen ieghenwardigh vnde tho komenden . vor alle desse vorscreuene stukke vnde articule . stede vast vn(de) / vnuorweldet tho holdende . vnde vor saken aller vtnemẏnghe vnde hulpe rechtes gestlykes eder werlekes . Nyer droghene / vnde vuͦnde . bedroghene ouer de helfte rechtes geldes . droghene de gift sake desses kopes . vnde weder ghe(n)nẏnghe an en / gantz . vnde aller anderen luͦde dar me desse ieghenwardighe scrift an eme dele oder gantz mach mede breken oder / hinderen . tho ener merer bethughinghe . so hebbe wi hinryk van der osden Rydder . vnde wi hinrik manduuel / vnde ventzeke van Nemer vornuͦmet vse ynghesegel henget an dessen bref . ghegeuen tho plote an den iaren godes / druͦtteynhundert andeme achte vnde sostegesteme iare . des suͦndaghes tho mit vasten .