JN godes Namen amen . Ich clawes [...] en mit mineme(n) sone . Tesleue(n) vnde mit minen Rechten Erfnamen . be kenne vnde be thuge openbar(e) vor / allen cristen luden . dessen ieghewardighen bref an sen . vnde horen lesen . dat [...] ¹ mit ener gantzen . endracht vnde mit vulbort vser Erfnamen vnde vser / leuen vruͦnt . vnd(e) mit guden willen vnghodwugen . hebben vor koft vnde vorkopen in deseme breue . den Erbaren wisen luden . den Ratmannen . der stat tuͦ / stolpe vnde der me(n)nheẏt . der seluen stat . vse guͦt . dat pretitze ghe nomet is vnd(e) liggende is binnen der letznisse . der seluen stat guͦde . mit aller / rechtecheẏt mit aller nuͦt mit aller vruͦcht vnd mit alme rechte mit deme neddesten . vnde mit deme hoghesten . in hant vnd in hals . also id licht binnen / siner scheyde de hir na screuen is . vnd wi beseten hebben . went an(e) dessen dach ewichliken . vriliken . redeliken vonliken vnde vredeliken . Ewich vnde nim/mermer tuͦ be sittende . ane ansprake ane bekuͦmmeringhe . ane iegheghe[... v]nde¹ lettinge miner edder miner erfnamen . vnde hebben en dat / vorscreuene gud gantz vor koft mit ackere Ruͦm vnd vnruͦm buwet vn]e vngebuwet mit holte drachtech vnd nicht drachtech mit buͦsche(n) / mit bruken vnd dotbruken . mit wuͦstenyen . mit weyden . mit wesen . mit wat(er) vletende vnde stande mit see vnd mit deken . de nuͦ sint edder / hir na werden mochten . mit weghen mit steghen . als id binnen siner bescreuenen steden liggende is . vnde be holden dar nicht ane dar wi hir / na dessen cop . nie(men)de hinder(en) edder be weren mochten edder van vnsen erfnamen vorstoret mochte werden . vnde be kennen ok . des . dat vns dat vor be / screuene guͦt . Reddeleken vnd gantz altomale betalet is . vnd wi dat ghelt in vse vnd vser Erfnamen . behuf vnde nuͦt ghe brocht hebben also alse des=/se vor screuene . cop ghe scen is alse wille we clawes vnde teslaf . vor be screuene guͦt vnse erfnamen . stede vast vnde vntuͦbroken holden . ewich vnde nim/mermer vnd vppe dat dat hir [...]ewerre ¹ . edder hinder hir na an desme cop werde . so hebbe wi . den suluen ratmanne vnd der menheyt . de stede / vnde de grentze bescriuen laten in desme breue . be reden be scalmet vnd bestete[...] ¹ also hir na screuen steẏt . Dit is de stede der letznisse vnde de grentz / In deme irsten van eme stene de het sornboten tene ane rechte ra . wente vp der laüghen bergh , van deme laughen berge wit ouer den negesten bergh / den sach en lant went an dat söghrop ? de grvͦte Ek van der g(ro)ten Ek . dat segh vort vp . went vp ene böke bi deme seluen seghe . vnde vort van der boke . / en Ra recht vt wente vp enen lengh . hoͤt des mynschen hoüet . van deme berghe vp enen stenbrugh . dar de rughe Ek bi steyt twischen dar [...] / vnde der letznisse . vort mer ouer den wech . de geyt van pre(n)tutze . vppe en bestotene grentze vnd vort vp ene bestotene ek . de steẏt bi deme bruke / vort van der ek . vor dat bruk al vaste vp enen be stotenen sten van deme stene ouer dat bruk ene Ra . vp enen groten wuͦren bom vort van deme / bome ene ra recht vt . ouer den lant wech . vp ene Ek . vnd ene ra wort went vp de stolte wuͦren . vnd ene ra vort vp ene be stotene ek . dar ok de / grentze van sukere an stuͦt . van der ek ene ra recht van sich vp ene Ek wit vp en berk stufte vp ene and(ere) ek . dat berk stufte dore ene ra . vp / ene bestotene ek vnd vort vp enen sten brinck . vnd vort vp enen sten brinck . vnd vort vp ene esspe de steẏt vome ande(re)n sten brucke . denne vort vor den bergh vp twe ek bömer den(n) / vort ene ra wente vor enen amberch . vp ene ek . dat sich stedet de grentze(n) oc suker vnd [...] mellin . vnd der letznisse . vort den ambergh dale vp en . / bruk . vnd dat bruk ouer bi en segh vp ene Ek . vnd vort bi en sol . vnd dat sol ent lank vor enen bergh vp ene danne vnd vort ouer ene muͦsse vp / ene be stotene ek . vnd vort enen bergh vp . ener vp ene eke de steyt vp eme ambergh vp . ouer vp ene ek . denne vort ene ra recht vt wente vp ene(n) tri/den bergh . vp en ek vnd vort ouer ene gruͦnt . vp ene eke de steyt vp eme berghe . vort vp ene eke de steẏt vp ener holen grunt . dar sich de meline/sche stede stedet vnde de letznisse . dit de grentze vnde steyde be raden be scalmet vnde besteten . also wi se ane hinder be seten hebben . also hebbe wi se / vnd dat gut dat dar binnen be grepen is vor koft . den sulüen ratma(n)nen vnde der menheyt ewich vnd ni(m)mer tuͦ be sittende vnd dat dat also bliuen vnd / holden scal werden . so hebben wy clawes vnd teslaf . vnse ingezegel vor dessen bref ge henget . de is ghe screuen vnd ghegheuen tuͦ Stolpe na godes / bort dusent iar drehundert iar in deme seuentegesten iare . des dẏmestedages in suntte Elizabeth daghe der hilgen wedewen . /