Den erewerdyghen vor(e)schychtẏghen loueliken ma(n)nen he(re)n borghermeyste(re)n vnd(e) ratma(n)ne(n) der / Stad tuͦ lubeke vnzen leuen vrunden wẏ ratma(n)ne der stad tuͦ Colberg vnzen vru(n)tliken grod / myt vlytlykeme deneste . Heren Ereuerdẏghe leuen vrundes . alz juwe erebarheyt vns heft / tuͦ ghe screue(n) . wo dat gẏ vnd(e) de menen Stede de in der henze sẏn hebben ene(n) ende myt den / vlamy(n)ghe . alzo dat deme kopma(n)ne eyn del syn schade wedder lecht wert alz wẏ vornome(n) hebbe(n) / des ys juwer erbarheit wol wytlik . dat wẏ eer vnze breue an jw ghe screuen hebb(e)n vmme . / vnzer bergher schaden den en de vlamy(n)ghe ghe dan hebben . alz detmer horn de vnzes rades / borghermest(er) was deme god gnedych sẏ . Tyderyk ryken . Hartwych dobelsten vnze kumpan des / rades Tydeke blok . vnd(e) hannes muddelmeye vnzen medeborg(ere)n . den ere schep vnd(e) ere gud ghe/nomen wart . dar se an schaden v(m)me ghe komen syn alz guͤd alz ccc nobelen . alz ze vns berich/tet hebb(e)n vnd(e) wẏ ok anders nychte(n) weren . men dat de schade sẏ ghe screuen mank anderen / schaden den de kopman ghe nomen heft . vnd(e) bydden jw heren leuen erewordyghen vrundes dar / gẏ dun dorch vnzes denstes wyllen vnd(e) helpen dar tuͦ alz gẏ beste kone(n) dar de vorben(omede) schade / Her jacob holke juwme kumpane des rades antword(et) werde van vns vorben(omede) medeborghe(re) / wegh(e)n de in desseme breue vorghescreue(n) sẏn vnd(e) wes em ghe antwerd(et) wert . dar hebben / se ene vor vns ghe koren vnd(e) ghe maket tuͦ eneme wulkomene houetma(n)ne dar ghelt / vptuͦbore(n)de lyke stede yft se suluen dar tuͦ antwerde weren . vnd(e) wes he alzo van erer / weghen vpbort vnd(e) entfenk dar scholen ze vnd(e) wyllen juw erebarheit nycht meer / v(m)me manen . Des moghe gẏ zeker tuͦ vns zeen vnd(e) bewyset juw hir ane alz wẏ kone(n) vn(de) / moghen . ghe screue(n) na der bort godes m ccc xcij iare an sunte nicola(us) aue(n)de / des hylghen bysschoppes vnder vnzer stad secrete ghe drucket an dessen bref Tho / eyner tuchnysse desser vorbonumeden stucke /