Vor alle den jenen de dessen bryf zeen edder horen lezen Jk Clawes Manduͦuele erfzeten to Dra=/zedewe vnde wy he(n)ni(n)gh vnde mattyes bruͦdere gheheten Manduͦuele syne eelyken sones beken=/nen vnde betuͦghen apenbar an desseme Jeghenwardeghen breue dat wy myt wolbedachteme / muͦde vn(de) vryghen wyllen Na rade vnser rechten eruen vnde neghesten vru(n)t Reddelken vn(de) rec/kelken hebben vorkoft vnde vorlathen vorkapen vn(de) vorlaten jeghenwardych myt macht desses breues to / eme eweghen doden kape den proͦueners y(m)me hylghenghyste vnde lubbrecht herm(e)n vn(de) merten / Sleue eren vorstende(re)n vnde den proͦueners y(m)me Sunte Juͦryen vn(de) hynryk Swarten vnde Stef/fen Stubbe ere(n) vorstenderen to truͦuerhand vnde eren nakamely(n)ghen vnde den Borghermeste(re)n / kemereren vn(de) deme ganzen Rade to Colberghe alze den ouersten de nuͤ yn der tijd synt vn(de) ere(n) na=/kamely(n)ghen to eweghen tijden den ouersten vorstende(re)n der gadeshuzen vorscre(ue)n dat halue dorp / Czymeytzel alze dat lycht yn synen scheden myt synen tobehori(n)ghen myt hoͦuen myt huͦuen myt ka/then alle vnse erue vnde leen vnde dar to de leen ware yn der kerke mynen pryste(re)n to vorlene(n) v(m)me ga=/des wyllen vnde alle vp bory(n)ghe alze pacht Rogghen vlas vnde raekhunre vnde der [Mer(er)yenere] vp / to horende vn(de) to enefanghene vthe deme vorscre(ue)n dorpe Czymeytzel van Drevndetwyntych / huͦuen jnt yrste van werners huͦue Dre m(a)rk pacht myn vyer schylly(n)ghe dwe schepel Rogghen / enen tap vlasses vn(de) een raͤkhuͤn vthe Clawes kuͤrpines haue myt twen huͦuen zakehalue / m(a)rkpacht vyer schepel rogghen twe tappe vlasses vn(de) een reͤkhuͤn vthe peter maͤrten haue myt / vyer huͦuen dre huͦuen gheuen yslyke dre m(a)rk pacht myn vyer schylly(n)ghe vnde de vyerde huͦue de / ghyft dre m(a)rk pacht vn(de) vyer schylly(n)ghe vn(de) zos schepel rogghen dre tappe vlasses vnde een / raͤkhuͤn vortmer merthen Euerd ene huͦue der m(a)rk pacht myn vyer schylly(n)ghe twe schepel rogghe(n) / enen tap vlasses vn(de) een raͤkhuͤn Jt(em) Clawes Tesmer ene huͦue der m(a)rk pacht my(n) vyer schylly(n)ghe / Twe schepel rogghen ene(n) tap vlasses vn(de) een raͤkhuͤn vthe Clawes luchten haue der huͦuen yslyke / huͦue ghyft dre m(a)rk pacht vnde vyer schylly(n)ghe zos schepel rogghen dre tappe vlasses vn(de) een / raͤkhuͤn Jt(em) yn der ande(re)n syde vthe hynryk luchten haue twe huͦuen zostehalue m(a)rk vyer sche=/pel rogghen twe tappe vlasses een raͤkhuͤn vthe Roͦuenhaghens haue dre huͦuen achte m(a)rk vn(de) / vyer schylly(n)ghe pacht zos schepel rogghen dre tappe vlasses vn(de) raͤkhuͤn Jt(em) ankelman ene huͦue / vn(de) twe katen van der huͦue dre m(a)rk pacht myn vyer schylly(n)ghe twe schepel rogghen ene(n) tap / vlasses vn(de) een raͤkhuͤn Jt(em) vthme Oreghe twe huͦuen zostehalue m(a)rk pacht vyer schepel rogghen / twe tappe vlasses vn(de) een raekhuͤn Jt(em) vor de veyly(n)ghe vn(de) vor den tappen twe m(a)rk my(n) vyer schylly(n)ghe / Jt(em) vthe der male druͦddehalf dromet Rogghen malenpacht vor twe dusent m(a)rk guder vynkena/ghen mu(n)te de ze vns rede tellet vn(de) to ender vulkamenen nuͦghe wol betalet hebben eer der maky(n)ghe / desses breues vnde wy de yn vnse nuͦt vn(de) nuͦttecheyt ghekeret heben vnde dyt vorscre(ue)n halue / dorp Czymeyczel haͤue huͦuen kathen vn(de) pacht hebbe wy en vorkoft myt alme rechte myt wesen / myt watere myt weyde myt ackere myt holty(n)ghe myt buͦsschen myt bruͦken myt muͦren myt vrig=/ke myt dynste myt vmplycht myt deme hoghesten vn(de) zydesten rechte an hals vn(de) hant alze / wy dat to voren alder hoghest vnde vryghest bezeten vnde hert hebben myt aller vrygheyt vn(de) rech/techeyt Ok so hebbe wy Clawes de vader he(n)ny(n)gh vnde mathyas syne sones gheheten Manduͦuele / vorscre(ue)n van vnser vn(de) van vnser eruen weghen den prouener y(m)me hylghenghyste vn(de) y(m)me su(n)te / Jvryen eren vorstende(re)n vorscre(ue)n vnde deme gantzen Rade vn(de) eren nakamely(n)ghen to Colb(er)ghe desset / vorscre(ue)n halue dorp haue huͦuen kathen vn(de) pacht vorlaten myt eren tobehory(n)ghen vor vnseme heren / van Camyn Bysschap he(n)ny(n)ghe vnde hebbe zee dar an ghewyset myt alme rechte vnde na der vorlaty(n)=/ghe waren alze y(m)me lande eyn recht ys vor allerleye ansprake ghyͤstlyker vnde werlyker personen de / vor recht kamen wyllen recht gheuen vnde nemen wyllen Ok so moghen zy desse vorscre(ue)n pacht / hoͦue huͦuen vn(de) kathen vorscre(ue)n vorkapen vorseeten vorwesselen vorande(re)n yn ghystlyke edder yn wer/lyke achte wor edder weme ze suluen wyllen vnde wy edder vnse eruen scholen vnde wyllen dar nycht / mer vpsaken yn tokame(n)den eweghen tijden Thuͦ tuͦghnysse der warheyt . desses vorscre(ue)n vor ko/pes vnde kapes vnde alle artycke(le) vnde een Jewelyk artikel by zyk stede vn(de) vast to holdende an / ghuͦdeme louen vnde truͦwen so hebbe wy Clawes de vader vnde He(n)ny(n)gh vnde mathyas syne zo=/nes ghehethen Manduͦuele vorscre(ue)n vnse Jnghezeghele myt wytschap vn(de) myt vryghen wyllen / vor dessen apenen bryf lathen henghen Screuen vnde gheuen na der bort cristi to Colberghe Du/sent vyerhundert Jaͤr dar na yn deme liii Jare des daghes Agnetis der hylghen Juncvrowen /