Vor alle den Ienen dar desse apene breff vor kumpth de ene zeͤn edder horen lesen Ik Hans Runghe borger to Colberge Bekenne / vnnd betuge apenbar mit mynen eruen Dat ik bin schuldich Deme werdigen ma(n)ne her Iacobe gerde vicario der doͤmkerken vnser / leuen vrouwen to Colberge vnde synen rechten erue(n) Edder wor her Iacob vorscreue(n) dat denket to geuende Jn syme testamento / voftich mark houetstules wanliker mu(n)the . dar me drüttevndehaluen rynschen gulden mede kopen kan De ik van em entfanghenn / vnde kregen hebbe eͤr der makinghe desses breues Dar vor schal ik em geuen alle iar veͤrdehalue mark rente der suluen mu(n)the / De ik eme vnbeworen wol betalen schal vnd(e) wil up den dach der hilgen drekoni(n)ghe sunder weddersprake . vortoch . entschuldinghe / vnd(e) rechtgand So langhe dat ik den houetstul wedder affgeue vnd(e) weret sake , dat ik de vorscreuen(en) veͤrdehalue mark rente . up / den vorscreuen(en) dach nicht vth geue vnd(e) de vorbenomede Her Iacob gerdt edder syne eruen Ienigen bewisliken hinder edder schade(n) / daru(m)me deden edder doͤn müsten , Dorch qwader edder tragher betalinghe willen der rente edder houetstules vorscreue(n) , De schade / were luttlick edder groth . geistlik edder werlik , Den laue ik Hans Rünghe mit myne(n) erue(n) Deme vorscreue(n) her Iacob gherde / vnde synen eruen , up to richtende like deme houetstule vorscreue(n) Weret ok sake Dat her Iacobus gredt edder syne eruen . den / suluen houetstul mit der rente wolde affmane(n) Edder ik Hans Rünghe edder myne eruen , en wedder wolden affgeuen . So / schal vnse ene deme anderen , eyn halff iar to vorne to segghen . vnde denne na der tosegghinghe . vp den negesten dach / der hilgen drekoni(n)ghe Schal vnde wil ik Hans Runghe mit myne(n) erue(n) eme geuen druttevndehaluen rynschen gulden / houetstules an golde vnd(e) verdehalue mark rente an eyneme sume(n) vnde willen nene rente an den houetstul rekenen Alle / desse vorscreue(n) stucke vnd(e) artikele vnd(e) eyn Ieder by sick . laue ik Hans Rünghe mit myne(n) eruen stede vnd(e) vaste to holdende / An loüen vnd(e) an guden trüwen Tho mer sekerheit vnd(e) tuchnisse der warheit So hebbe ik Hans Runghe myn Jnge=/segel vor my vnd(e) vor myne erue(n) laten hengen . vor dessen apenen breff Den Ik nicht breken wil mit qwite breuen . edder / mit eden . Ok mit nenen clausulen vfte artikulen . de Jn den rechten beholden synt Dar me zodane breue mede krencken / vfte breken mach . Sünder alleyne wen de betalinghe schud . So schal twen heren Jn deme rade to Colberghe / witlik weszen . Screüen vnnd(e) geuen tho Colberge Na der borth vnses heren Jesu cristj Dusent veͤrhundert Jn / deme viff vndd(e) negentigesten Iare Ame Pingest Auende /