Den erbaren mannen den . . Ratmannen , vnde den . . Schepen to Premslaw enbie=/de wie . . Schepen d(er) Stad to Magdeburch vnse willighe dienest , Gi hebben vns ghe=/screuen in juwen brieuen wo juwe herren die . . Ratmanne juwe kumpan die sculthete / vn(de) die schepen mit juͦ die langhe vorstoruen sin , vnde vorghan is wol drie vn(de) drittich / jar gheuen ore brieue beseghelet vnd(er) deme jngheseghele juw(er) stad , eẏme borghere vo(n) Stetẏn / die hiet herman von anghermuͦnde vppe vifhundert mark vn(de) viertich brandeburghes silue(re)s / die sie ome sculdich weren binnen eẏme jare to betalende , also it openbar is in der vtscrift / die gi vns senden mit dissen jeghenw(er)dighen brieue(n) dat gut wart vn(de) is altomale betalet / vn(de) die brief die wart vorsuͦmet dat man on nicht weder eschede vn(de) worgheten wart / Des kumpt om Role vo(n) a(n)ghermu(n)de eẏn borghere to Stetẏn , die is sones sone herma(n)nes / vo(n) anghermu(n)de die benomet vor is vnde sin elderuader was roͮlen , vn(de) beklaghet juͦ / vn(de) jvwe borghe(re) vmme dat benomede gut , na doder hant mitten brieue(n) die hie gheuun=/den heft vn(de) dat gut io betalet is , vn(de) binnen eẏn vn(de) drittich jar nẏe ghemanet vnde / gheeschet is , Nẏwert vo(n) sime eld(er)uadere , oder rechte vadere , dese binnen vierteẏn jaren / gheleuet hebben , vnde ok von siner weghene nicht ghemanet is vn(de) wart inen nuͮ binnen / twen jaren , Hir vmme so bidde vnse gude vn(de) wisheit , dat wie juͦ hir vp eẏn recht willen / gheuen dorch god vn(de) d(er) rechticheit wante dat gut betalet is , vn(de) nẏ bi so manighen iaren / manet vn(de) eschet is , wo gi na eẏnem magdeburgheschem rechte , moghen vn(de) scolen juͦ , vn(de) / juwe borghere der anklaghe weren , dat gi juwe brieue vrigen vnde weder krighen , vnde / der mani(n)ghe quit vn(de) los werden na rechte , Hir vp spreke wie vor eẏn recht , Js dat Role / von anghermu(n)de tospriket deme scultheten den Schepen , vn(de) den Ratmannen , vnde der / ghemeẏnheit der stad vmme scuͦlde von sines elderuaderes weghene na doder hant des / hie der stad brieue hebbe vnde is dat selue guͦt beret sime elderuadere , also dat on dat / witlik is , vn(de) wil sie die selue Role dar vort vmme scuͦldighen na doder hant , so scal / d(er) stad meister selue leuede vppe den heilighen behalden , dat ome dat witlik si dat dat / gut beret si , vnde dar mede so heft hie gheledighet , den . . Scultheten . die . . Schepen , / die . Ratmanne , vnde die ghemeẏnheit der stad , der ansprake , der doder hant , wolde , / hie auer to spreken deme scultheten , den Schepen , den Ratma(n)nen , bisunderen , io welke=/me binamen , die scolde dat vppe den heilighen behalden mit sines eẏnes hant , dat ome / dat witlik were , dat dat ghelt beret were, von erer Stad weghene , Hir mede / hebben sie ore borghere vn(de) ore brieue gheledighet von rechtes weghene , Dat / dit vns(er) Stad recht si , dat bethuge wie vnder vnseme jngheseghele , dat wie / to ruͦcghe hebben ghekleuet laten an dissen brief , Den wie ghegheue(n) hebben Na / goddes ghebort , dusent jar , driehundert jar , An deme neghene vn(de) drittighesten / jare , Des neisten vrẏdaghes vor deme sondaghe , cantate domino /