Wje . . Ratmanne . vnde . dere Inünghe . . Mestere . vnde . de burghere ghemeyne der stad to . Magdeburch . bekennen an . / disseme opene breue allen . den . die on . seen . oder horen , dat . wie . vns . vnder sproken . hebben . mit vnsen . vrunden , den , / burgheren . von . halberstad . Queddelingburch . vnde von . aschersleue , v(m)me . eyne were , vnde . hulpe , vnde . sint mit one ouer eyn . / ghe komen . an . disser wise , Were dat jemant . sie . vor . vnrechte(n) wolde , oder vor . vnrechtede , hie were wie hie . were , swanne sie / vns . dat . vore . kunigheden deme . en . scole . wie mit jenegherleye vordernisse behulpen wesen . vnde . scolen . recht . vor sie beden , / vnde . moghe . wie . binnen . achte . daghen . one neynes . rechtes . helpen . , so scole . wie . on . en . , zeghen . vnde scolen . one behulpen wesen . / inder . wise . alse . hir . na . bescreuen . steit . , also langhe . wentet . on . werde . weder . dan . , Tho deme ersten male . swenne . sie . dat . von . / vns eyschen . vere daghe . vore , so . scole wie on . senden . sesteyn . man . mit gleuien vnde . vier stucten . , vnde . die . scolen sek erheuen / in deme . verden . daghe dar na . alse sie ghe eyschiet sin . vnde . volghen . , Were ok dat sie dat . eschieden . so . scolden der . sesteyn . / man mit gleuien achte . helme . hebben . , vnde wenne die Twintich . manne . to on . komen . so . scolen sie . on . gheuen kost , voder , vnde / hofslach , anderes . en . scolen sie on neyne pantquitingh . don . , vnde wie scolen on . den . solt gheuen . , vnde nemen die Twin/tich manne vromen . oder . scaden . vppe deme weghe af . vnde . to totende den . scolen sie vnde wie anbeydent syden . glike . / draghen , Auer . komen . vnse . Twintich manne . to . oreme . volke nemen . sie dar vromen . mit oreme volke den . vromen sco/len . die Twintich manne nemen . na . mantale . vnde . die mantale scolen . sie vnde . wie glike nemen , vnde die Twintich manne / scolen sie . by sek . behalden , vier weken eft . sie orer . bedoruen . , bedoruen . sie orer auer lengher dat . scal wesen mit vnseme , / willen . Vortmer . is . dat . sie . des bedoruen . so . scole . wie . on . senden . vierhundert . man . ghe wapent vppe waghen oder vppe . / perden vnde die scolen . sek erheuen . indeme verden . daghe , alse . sie ghe eschiet sin . vnde . scolen volghen . , vnde sie scolen on . / gheuen . kost . voder vnde hofslach . anderes . en . scolen . sie . on . neyne pantquitingh don . , vnde wie scolen on . den solt . gheuen , / vnde . dit . volk . scal . by . on bliuen vier weken . eft . sie . orer . bedoruen . , bedoruen sie auer orer . lengher dat scal . wesen mit vnse/me . willen , Ghe scheghe . ok . dat . disser . dryer . stede jenich . bestallet . worde , oder dat man . sie . swerliken vorbuwen wolde , / so scolde . wie on . to hulpe komen . mit al vnser macht . , dat . is . vt deme huse eyn . man , vnde . sie scolen sek . indeme verden daghe / erheuen dar na . wanne sie ghe eschiet sin . vnde . were . dat . disse vierhundert manne oder die gantze volghe . vrome(n) . / nemen . mit oreme . voke den . vromen . scollen . sie vnde wie . na . mantale glike nemen . , vnde nemen . sie dar scaden . des . god . / nicht . en . wille den . scaden . scal . eyn . jowelk stad . siluen . draghen . vnde . die . gantzen . volghe scolen sie . bekosteghen . alse . von . / den . anderen . vorebescreuen steit , Were ok dat . vnse herre von . Magd(eburch) . vor vnrechtede . vnsen herren von . halb(i)r(stad) , so scolde . wie . / vnsen . herren . von . Magd(eburch) . bidden . vnde . berichten , dat hie von . deme vnrechte lete wolde . hie auer . dorch . vnser bede willen . / dar nicht auelaten so . en . scole wie ome to deme vnrechte nicht . behulpen wesen , Were . ok dat die burghere von , / halb(i)r(stadt) Queddelingburch . vnde van aschersleue , vmme . disser vorrede weghene , alse . die [wer(en)] na dissen . dren jaren . jemant / be scaden oder anverdighen . wolde , dorch . hulpe . willen . die . sie . vns . ghe dan . hebben da[r] scolde wie Truweliken helpen we/ren inder wise alse hie bouen . steit bescreuen , Echt vortmer were dat jemant vorvestet oder vor vemet . worde . in je/negher . disser dryer . stede vmme . rof , Mortbrand , duue , verretnisse . oder des glik die scal . mit vns vor vestet . / vnde vorvemet wesen . gliker wis alse jn jenegher . disser . dryer stede , swanne sie . vns dat . en beden in oreme breue , vort/mer mit deme orloghe dar disse vorbenomeden stede , dre , inne begrepen sin . mit den . greuen . von reghensteyn . in disser / jeghenwerdighen tid . dar en . scole wie vns nicht mede beweren , Mer were dat jemant . na . disser tit . sie vor vnrechten wol/de dorch der von reghensteyn weghene dar scole wie on to behulpen wesen , alse hir bouene steit bescreuen Disse vor/rede . vnde dedinghe scolen stan , Twischen . den . dicken . vorbenomeden . dren . steden Halb(i)r(stad) , Queddelingburch , vnde von / aschersleue vnde . vnser . stad . von . disseme , daghe . an . vnde . scole(n) , waren . wante . to sinthe Mychahelis daghe . nu nilkest to ko/mende . vort . ouer . dre jar . allerneist . dar na . gande . dat . loue wie . jn disseme siluen breue gantz vnde . stede . to halden . / de . alse hir . bouen . steit . bescreuen , Vp . eyn . orkunde . disser . dingh . so . hebbe . wie on dissen bref ghe . gheuen . be vestenet . / vnde beseghelet . mit . vnser . stad . anhanghededen . Jngheseghel . na . goddes . ghebort , dusent jar , dre hundert . jar jn deme . / eynen . vnde . voftighesten jare in der Twelp . boden daghe , /