We Her Johannes deken to sinte Bartholomewese inder stad to Cerwist vnde Conrad perrer to sinte Katherinen inder stad to Magdeborch be / kennen opeliken indisseme ieghenwordighen breue vor alle den de en seen eder horen . dat schelinghe was twischen den erbaren luden . dem / Dekene vnde deme Capitele to sinte Nicolawese vp dem Nienmakete to Magdeburch . vnde Hanse daghevir vnde sinen eruen borghere to Cerwist / vmme eẏnen wischepel wetes . vnde tvene wischepele rogghen jarighes tinzes an der molen des wosten dorpes to dodewis vnde vmme den / vischdik der seluen molen de de selue Hans daghevir inhebbender were hadde . vnde de vorghenanten . . deken vnde vnde Capitel to Sinte / Nicolawese in ansprake hadden vor gherichte , also dat itteswelke ordel dar ouer gheuen waren . des worde we to lesten von beyden par/tien to sceydelude ghenomen . de sake mit vru(n)tscap to entscedende , vnde to berichtende . vnde we hebben se wru(n)tliken entsceden vnde vor eẏ/net also dat en ghe noghet , Jndisser wẏse also hir na ghescreuen steÿt , de vorghenanten . . Deken vnde Capitel to Sinte Nicolawese scolen / binnen disseme ansta(n)den Jare nv von sinte Jacobes daghe antorekende , wente to Sinte Jacobes daghe vort ouer eẏn Jar eft se willen , Hanse / daghevir , eder sinen eruen eft he nicht were , gheuen vor de dre wischepele kornes , an der vorghescreven molen , achtehalue mark vnde=/dirtech Brandeburghesches silueres , inder stad to magdeburch to beredende . vnde de wile se de beredinghe nicht en don . so scal hans daghe/vir vnde sine(n) eruen de tins volghen von den tins daghen de de wile komen . auer wan dit ghelt Hanse daghevire be ret wert , so scolen / de herren to sinte nicolawese vp den neghesten tins dach dar na vnde vort mer ewichlichen dat korn vp nemen , vnde Hans daghevir vn(de) / sine eruen scolen des kornes mit alme rechte vnde nvt vor tyen vnde herren volghen laten . dit korn gikf ¹ men to dissen ver tiden. to Sinte / Jacobes daghe . to aller godes hilghen daghe . to vnser vrowen daghe lichmissen . vnde to Sinte Wolburghe daghe . Were auer dat de herren / des capiteles to Sinte Nicolawese , dom vorghenanten Hanse daghevir vnde sinen eruen , disse vorghescreuene achtehalue mark vnde dirtech bin/nen disseme Jeghenwordighen Jare nicht en gheuen , so scolde de selue Hans daghevir , vnde sine erfnamen na eme , eder weme he dat korn / lete , roweliken vnde erfliken ewiliken besitten vnde behalden vnde de herren des capiteles to sinte Nicolawese en scolen se noch dat good ny/mer mer anspreken noch an deghedinghen . Vm den vischdik hebbe we se also entscheden dat Hans daghevir den behalden scal vredeliken / vnde de herren don sinte nciolawese laten dar mit willen af . also dat men den dik vp gheuen , vnde vp nemen scal vor den buren vn(de) burmes/tere to dodewis also eẏn wonheyt is ghewesen von langhe here . also dat Hans daghevir mach den vischdik eruen weme he wel eder laten / ane ere weder sprake . Thughe sint disser vorghescreuenen dinghen . Hans aleman , vnde Fricke von Godensweghen , borghere to magdeburch . To / orkunde des dat we disse entscedinghe ghedan hebben , vnde dat beẏden partyen dat an ghe noghe sẏ . so hebbe we vnse Jngheseghele , mẏt / eren Jngheseghelen an dissen bref ghehenghet Vnde we Johannes deken vnde dat ghe meyne Capitel to sinte Nicolawese vp dem Nien/markete to Magdeburch , bekennen Jndisseme Jeghenwordighen breue dat vns an der vorbescreuenen entscedinghe ghe noghe is vnde willen / de stede vnde gans halden . to orkunde so hebbe we vnse Jngheseghel an dissen bref ghehenghet . vnde ik Hans daghevir borghere to Cer/wist bekenne ok , dat me an disser entscedinghe noghe is vnde wille de mit minen eruen stede halde . to tuchnisse so hebbe ik ok min Jnghe/seghel bi der vorghescreuenen herren Jngheseghele an dissen bref ghehenghet . Disse deghedinghe vnde berichtinghe , is ghe schen nach Godes / ghebort dirteẏnhundert Jar , Jndeme tveẏ vnde sestighesten Jare Jn Sinte Olrikes daghe des Heylighen biscoppes /