We Her Johannes deken to Sinte Bartolomewese inder stad to Cerwist . vnde Conrad perrer to Sinte Katherinen inder stad to Magdeburch bekennen / opeliken indisseme Jeghenwordighen breue vor alle den de en seen eder horen . dat schelinghe was twischen den erbaren luden dem . . dekene vnde / dem Capitele Sinte Nicolaweses vp deme Nienmarkete to Magdeburch af eyne half . vnde Hanse daghevir vn(de) sinen eruen borghere to Cerwist af / anderhalue . vm eẏnen wischepel wetes . vn(de) tvene wischepele rogghen Jarighes tinzes ander molen des wosten dorpes to dodewis . vn(de) vmme / den vischdik der seluen molen . de de solue Hans daghevir inhebbender were hadde . vnde de vor ghenanten . . deken vn(de) Capitel Sinte Nicolawes / in ansprake hadden vor gherichte also dat itteswelke ordel dar ouer gheven waren . des worde we to leste(n) von beyden partyen to scheydelude ghe / nomen , de sake mit vru(n)tscap to entscedende vn(de) to berichtende . vnde we hebben se vru(n)tliken entscheyden , vn(de) vor eynet . also dat en gheno/ghet . Jndisser wise also na ghescreven steyt . de vorghenanten . . deken vn(de) Capitel to Sinte Nicolawese , scolen binnen disseme anstanden jare / nv von Sinte Jacobes daghe , an to rekende wente to sinte Jacobes daghe , vort ouer eyn jar , eft se willen Hanse daghevir eder siner er/ven eft he nicht were gheven vor de dre wischepele kornes ander vorghescrevenen molen . achtehalue mark vnde dirtich Brandeborghes/sches selueres in der stad to Magdeburch to be redende . vn(de) de wile se de beredinghe nicht en don . so scal Hans daghvire vn(de) sinen eruen / de tins volghen , von den tins daghen de de wile komen . aver von dit ghe[l]t hanse daghevire beret wert , so scolen de herren to sin/te Nicolawese . vp den neghesten tins dach , dar na vn(de) vort mer ewichliken dat korn vp nemen . vn(de) Hans daghevir vn(de) sine erven sco/len des kornes mit alme rechte vnde not vor tyen . vn(de) den herren volghen laten . dit korn gift men to dissen ver tiden . to sinte Ja/cobes daghe . to aller godes hilghen daghe . to vnser vrowen daghe lichtmissen . vn(de) to Sinte wolburgh[en] daghe . were auer dat de herren / des Capiteles to Sinte Nicolawese , deme vor ghenanten Hanse daghevir , vn(de) sinen eruen . disse vor screuen achtehalue mark vn(de) dirtich / binnen dissene jeghenwordighen jares nicht en gheven so scolde de selue Hans daghevir vn(de) sine erfnamen na eme eder weme he dat korn lete / reweliken vnde erfliken eweliken besitten vnde behalden . vnde de herren des Capitels to sinte nicolawee , en scolen se noch dat gvt nymer / mer anspreken noch an deghedinghen Vm den vischdik hebbe we se also entscheden . dat Hans daghevir den behalden scal vredeliker vnde [de] / heren von sinte Nicolawese laten dar mit willen af . also dat men den dik vp gheven . vn(de) vp nemen scal . vor den buren vnde burmestere / to dodewis also eyn wonheyt is ghewesen von langhe here . also dat Hans daghevir mach den visdik eruen weme he wil eder late(n) ane / ane ere wedersprake . Thughe sint disser [vor]ghescrevenen dinghen Hans Aleman vnde Fricke von godensweghen . borghere to Magdeborch / To orkunde des dat we disse entschedinghe , ghedan hebben , vn(de) dat beyden partẏen dar an ghe noghe sy . so hebbe we vnse Jngheseghe/le mit oren Jngheseghelen an dissen bref ghehenghet laten . Vnde we Johannes deken vn(de) dat ghe meẏne capitel to Sinte Nicolawe/se vp dem nienmarkete to Magdeburch bekonnen indisseme Jeghenwordighen breue . dat vns an der vor bescreuenen ent schedinghe / ghe noghe is . vnde willen de stede vnde gans halden . to orkunde so hebbe we vnse Jngheseghel an dissen bref ghe henghet . vnde ik / Hans daghevir , borghere to Cerwist . bekenne ok , dat me an disser entscedi(n)ghe noghe is . vnde wille de mit mynen eruen stede halden . / to tuchnisse so hebbe ik ok mẏn jngheseghel bi der vor screvene herren Jngheseghele henghet laten . Disse deghedinghe vnde berich/tinghe is gheschen nach Godes ghebort dirteẏnhundert jar . Jndeme tvey vn(de)sestighesten Jare , in sinte Olrikes daghe des heylighen bis/schopes /