Jn dem namen goddis amen vppe dat . dat die dingh de inder tyt geschen . nicht nicht mid der tyt vorgan vnd nicht vorgetten werden von den de / tokomende sint . zo is dez not dat man sie vestene mid breuen alzo dat sie ewich vnd vnuorgetten bliuen hir vmme iz dat de Erwerdige in godde / vadir vnd vns(er) gnedigiste here bisschop Albrecht von der gnade goddis Ertzebisschop dez heligen goddishus(es) to Meideburch von fulbort vnd / mid eyndrechticheit der erafftigen . dez domprouestes dez dekens vnd gantzen capittels sines vorbenomden goddishus(es) to Meideburch . Sinen / lieuen getruwen vns borgern den wantsnydern in siner stad to Borch eyne ewige vnd stede Jnnige gegeuen hefft vnd gifft vns die Jnnige / vnd stediget sie in syme vorsegelden brieffe Jn sulker wiz dat eyn itzliker die vnse Jnnige hebben wil vnd mid vns wil wantsnyden . vnd ok don . / vnse Jnnigismeyste vnd vnse gantze Jnnige nemen willen . die schal vnser Jnnige geuen dre mark Brandeburchisilue(re)s vnd dat vnseme eg(e)nan(nten) / hern von meideburch vnd synem godishus(e) de dridde mark vallen . vnd he wil dar alle koplude vnd wantsnyde(re) von and(er)n landen vnd stedin vry / wesen schullin want to vorkopene . vnd to snydene up die Jarm(a)rkede beyde up sente wolburgen dach vnd sente dyonisij dach glik synen vor / benomden borgern to Borch . vnd wen die twene daghe . sente wolburgen vnd sente dyonisij dach iarmarkedes vorgan sien zö en schal nemant / dar na . dat sy dar buthen . adder bynnen der suluen syner stad Borch wantsnyden noch nergen der suluen stad up eyne myle na wanne sunder/liken . yn stedin dar gy werde market is gewesen . en bynnen . her en hebbe denne vns(er) wantsnyder Jnnige de dar vorgenant syn . were auer dat / ienich man want snede yn syner stad to Borch adder dar buten alze hyr vorscreuen is de vnse Jnnige nicht en hedde den we(n) vorgenan(nte) want/snyder vorclagen vor syme velende richte(re) yn siner vorbenantin stad to Borch vor dre mark Brandenburg(ischen) siluers vnd bekennet de dat he / want gesneden hebbe . zo schal he vns(er) Jnnige dre Brandenburg(ische) mark geuen vnd die dridde schal vnsem erg(e)nan(nten) hern von Meideburch gevallen / alze hir vor is gescreuen. vor saket he auer dez . zo schal de Jnnige hebben vor eynen vndingh . alzo beschedin . dez dat kind die Jnnjge / sake na synis vader dode by Jare vnd by dage . deyt mer dat kint dez nicht zo schal dat kint de Jnnige winnen lik eynem and(er)n alzo vorscreuen / is vnd die virgingh schal vns vorg(e)nan(nten) wantsnyd(er)n vallen dar en schal vnse here von Meideburch vorgenan(nt) nene(n) deyl ane hebben . vnd ok . / mege we enen wilkor vnder vns setten uppe dre pund wasses syder wol . vnd nicht hocher to vnsen lichtin to hulpe . dez to eme orkunde . / hebbe we Ratman(ne) wantsnyder vnd burge gemeyne to berich vns(er) stat Jngesegel in dissen breff gehengit . Na goddis gebort dreteynhund(er)t / iar yn dem vier vnd achtentigistinn iare in sand walburgen dage der heligen Juncfrauwen . /