Vnse(r)nn fruntliken denst tuuor(e)n Ersamen Besunder(e)n leue(n) frundes / vns heft to vorstande geuen Peter Meyer vnse Borger wu Andreas / Gerwisch Juwe Borger v(m)me Jtliken haringh den he myd Juk by(n)nen / Juwer Stad vorkoft vnd gesald hebbe , van Juk , dat de haringh / nicht kopgefe sin schulle Angelanget werde (etc.) des heft vns de g(enan)nte / Peter vnse Borger bericht dat de sulue haringh sine gewesen sij / vnd sy nye vnd ald haringh , dede nicht to straffene noch vuͤl vnd / kopmansweringe gewest , vnd sin dingh zo gewand is , dat he van / v(n)macht wegen nicht wal auerfeld wanderen mach , he walde Juk / des anders mu(n)tliken suluen wal berichten , wur v(m)me leue(n) frunde / bidden wij Jnbesunder(e)m flite gij willen dem g(enann)ten Juwem Borge(re) / Sodan(ne) anclage vnd moyge vorlathen , vnd ok de Je(n)nen de ohme / van des wegen noch wes schuldich vnd plichtich sin to vnderwisende / dat ze ahne betalen vnd sodanes Richtich maken , vnd gij willen Juk / v(m)me vnser bede willen , hir gutwillich Jnne bewisen vnd vinde(n) laten / dat de vnse van des wegen vngemoyget moge bliuen , dar ane don / gij vns besunder(e)n to dancke vnd wij vordenen dat Jn flite gerne / Juwe Antwerde Geschreue(n) Am dinsedage na Judica vnder , / vnser Stad Secrete Anno d(omi)ni (etc.) liijo /

Radmann(e) vnd Jnni(n)gesmeste(re) / der Alden Stad Magdeborch /