Vnnsern fruntliken dinst thuuor(e)n Ersamen leuen frunde So gi vns auer vpp vnsze schriffte Andreas Gerwẏsch . / Juwem(e) borger(e) anliggende v(m)me sodann(e) heringk , den Peter Meyer vnnse burger(e) oͤme gesand hefft vorantwerde hebben / geschreuen , dat de gn(a)nte Juwe borger(e) sodanen haringk vor nẏen haringk kofft , So de Junge Gerwẏsch vor Juwer leue / des schole bekant hebbin , hebbin wy to gudermaten vornomen (etc.) vnnd ok sodans dem gnanten peter vnsem burger / thuuorstahinde ggeuen , de vns darupp bericht , hefft , dat sodanen haringk den he oͤme gesandt hebbe , nẏe vn(n)d olt haringk / gewesin v(n)nd ẏo kopmans weringe gewest sẏ vnnd sodanen haringk de Juwe(n) ẏowelken bisundern noch sẏner werde vorkofft / hebbe , vnd were oͤm gantz swerlik dat de Juwe von deszwegin noͤde offte schaden lẏden schoͤlde , ok leuen frunde sẏnt / wẏ von Jtliken prelaten bẏnnen vnsir Stad des gnanten vnsers boͤrgers gude gu(n)ner nemliken dem wirdigen vnd Erhafftige(n) / her(e)n h(er)n Johann(e) Ruͤssingk deken der kerken sunthe nicolawesze vp dem Nẏen markede gebeden , von deszwegin an Juwe leue / thuschriuen vnd flitigen thuuorbidden , dat sodans moͤchte by gelecht werden , wuru(m)me bidden wẏ so wẏ flitigist moͤgen / also ehir , gi willen dem gnanten , Juwem borger(e) sodaner anclage von deswegen v(m)me vnsir bede willen vorlaten vppe / dat de gnante vnse Borger(e) von dem Juwem v(m)me soda(n)nes vort vnbededinget vn(n)d vngemoͤget moͤge blyuen , darann(e) dho / gẏ vns bisunder(e)n tho danke vnd wẏ vordẏnent Jnflite gerne , Mochte dat auer , ẏo nicht gesẏn Bidden wẏ gi willen eẏn / sodans fredeliken vn(n)d guͤtliken laten anstahin So lange wante gi vnd wẏ des rades by enander(e) thosprake komen . / darvth denne vorhandelinge thuhebbinde so dat men des to eẏner gruntliken wẏsze moͤchte komen des Juwe richtige / antwerde , Geschreuen am donredage na Quasunodogeniti vnder , vnsir , Stat Secret(um) Anno domi(ni) (etc.) l tercio /

Radmann(e) vnnde Jnnigismeister(e) / Der alden Stad Magdeburgk /