Vnsen fruntliken denst touor(e)n Ersamen bsunder(e)n guden frunde de Clawes klo=/densche dusse iegenwerdige vnse arme borgerynne hefft vns clagende bericht / wu eyn leddich geselle ohr ohre naturlike dochter gnant Jlse entforet vnd by(n)ne(n) / Juwe Stad Jnd gemeyne vntrichtige vrowen(n) husz geforet vnd dar vor gelt vor/sath vnd vorkofft hebbe dat twar so Juwe leue wol derkenne(n) sunthlick scheme/lick vnd clegelick genoch is eynen mynschen(n) also tho sodanen(n) sunthliken(n) / vnd schemeliken dyngen(n) to vorsettende vnd tho vorkopende . So wy dergeliken / by vns Jn vnser Stad Jn tyden geschen ok wol vornome(n) vnd dat gestraffet vnd / de so vorsatten des wedder ane gelt van den vrowen(n) vnd werdynnen(n) gefryet / vnd gehulpen(n) hebben(n) So wy des ok so wy dat wusten(n) vnd vor vns keme nicht / staden(n) willen(n) (etc.) Wu nu dem Ersamen(n) guden frunde Bidden wy deger fru(n)t/liken gy willen dusser suluen armen(n) vrowen(n) so vorder gunst vnd guden(n) / willen bewysen vnd behulpen syn . se desuluen ohre dochter uth alsodanem / sunthliken leuende itzund wedder krigen(n) vnd to huͦsz mit sick nemen(n) vnd ohrer / eyn dem andern helpen mogen(n) Jn beterynge ohres leuendes . sick to ernere(n)de / Vordenen(n) wy tigen Juwe leue wedder v(m)me Jnflite gerne Geschreuen(n) / vnder vnser Stad Secret am mandage Vdalrici Epi(scopi) Anno domi(ni) (etc.) xcprio(r) /

Rathman(e) vnd Jnnigismester(e) / der alden Stad magdeborch /