Vnsen fruntliken dinst thouoren Ersamen vnd Vorsichtigen Bsundern guden fru(n)de / Nach , noch swerynghe vorhandelynghe schrifften vnd wedderschrifften der vnghe=/licheid der vethe , hebben wy Jn gantz guder wolmenynghe allendhaluenn / thum besten vns des hyr bynnen vnser(er) Stad vormiddelt den Ersamen vnd(e) / vorsichtigen Radeszgeschickeden der Stede Calue . Groten Solte . der nyenstad / vnd Sridenborch magdeborch vnd Stafforde nuͦ So vorder beredet dat se eyn / Jowelk ohres Radessendeboden vnd wy ok de vnsen van Radeshaluen van / desweghen Am mandaghe negestkomende by Juwer leue bynner Juwer / Stad als denne tytliken opp den Auend Jn den herberghen tho synde efft god / will , schicken vnd hebben willen , dat wy Juwer leue Jn gude vorwitliken / Juk dar na mogen weten tho richtende vnd opp tho Satende , de dynghe / vord fruntliken tho handelende vnd Auesched tho nhemende vnd wur / mede wy Juwen Ersamenheyden vorder tho willen vnd denste syn moghen / dhon wy gerne Geschreuen vnder vnser Stad Secret Am dinsdaghe Jn / der Octauen Corporis Cristj Anno d(omi)ni (etc.) xciiij to Juwe antwerde /

Rathman vnd Jnnigismeister(e) / der Aldenn Stad Magdeborch /