Ich Mauricius von Schonow In geistliken rechten Doctor Thumher der kercken tho Magdburgh Bekenne vnd do kunth offentlick mit dissem briue vor mik Hansen Mauritzen von Schonow Albrechts seligen Szone myne vnmu(n)digen / Veddern Alle vnnse eruen vnnd erffnemen Alzo die Ersamen vnnd wyszen Burgermeister vnd Rathmann(e) der Stadt Stendall my mynen eruen Testamentarien vnd deme edder den so oren breff mit oren guden willen vnd wetten ynne hebben / viertigh gude Rinsche gul­den Jarlike tynsze vnnd Renthe vth orer Stadt bereidisten Schoten Tynszen, Renthen, Pflegen, vpboringen vnd gerechtigheiden Als sie alle Jar Jerliken Jn thokomen vnd up tho heuen hebben Mit loffliker gedachtnis / des durchluchtenn vnnd hochgebornnen Furstenn herr(e)n Johansen Marggrauen tho Brandenburgh Curfurstenn zeligen vorwilligunge vnnd fulbord vorscreuen vnnd vorsegelt hebben von worden tho worde ludende wu hir nach fel­iget / Wij Borg(er)meister vnd Radtmann(e) tho Stendall Bekennen vnnd betugenn Jn vnd mit disseme vnnserm offenbriue ver vnns vnnd alle vnnse nakomelinge vor alsweme die ohn sehn horen edder lesenn Dat wij mit Rade vnnd fulborth / vnser guldemeister(e) vnnd Borger gemeyne ,von vnnser upgnanten Stadt wegen Recht vnnd Redelikenn upp eynen wedderkopp vorkofft hebben vnnd vorkopen iegenwerdigen Jn vnd mit Crafft disses briues Deme werdigen herr(e)n Mauricio / Schonow Doctor ym geistlichen rechte Domherr(e)n der kercken Magdburgh synen eruen, Testamentarien vnnd dem(e) edder den dy dussen brieff mit synen guden willen ynne hefft edder hebben Viertigh gude Rinsche gulden Jarlicher tynse vn(n)d / Renthe vth vnnser Stadt bereidestenn Schoten, Tynsze , Renthen , Plegen , Vpboringen vnnd gerechtigheidenn alze wij Burg(er)meister vnnd Rathmann(e) alle Jar Jerliken in to komende vnnd up to heuende ohm alle Jar uff Purificationis Marie / bynnen der Oldenstadt Magdburgh adder Oldenstad Brandenborgh wur om(e) edder on(e) dat bequemest is vnnd sie vns dat touor(e)n tho seggen lathen tho gheuen vnnd tho betalenn . Dat wij ock alzo tho dunde vor vnns vnd alle vnse nachkom=/linge vnd Burger gemeyne Reden vnnd louen tho dunde vmbeku(m)mert aller vnd iglicher geistliker vnnd wertliker gerichte vnnd vnuorhind(er)t vnnd vnuorboden von eyneme ydermanne . Vor Souen hund(er)t Rinsche gulden houetsu(m)men . Die vns / de gelachte ? herr(e) Mauricius Schonow [etc] Zu eyner furnen ? reyde ouer getalt vornuget vnnd betalt hefft De wij vorder in vnnser Stadt nuth vnnd fromen dar vnns dat noth vnnd behuff was angelecht gewa(n)t vnnd gekart hebben . Doch / mit sodanem bescheide dat Wij edder vnnse nakomelinge Bug(er)meister vnd Rathmann(e) sodane Viertigh Rinsche gulden Jarliker tynsze vor Souenhund(er)t Rinsche gulden houetsu(m)men wedder kopen vnd losen megen welks Jars wij willen / Vnnd wan wij edder vnse nakomende Borg(er)meister vnd Rathmann(e) den wedderkopp dhun willen Dat scollen vnnd willen wij dem(e) gnanten herr(e)n Mauricio Schonow [etc] edder synen eruen Testamentarien , edder dem(e) effte denn die disse(n) brieff / mit synen guden willen ynne hefft edder hebben . eyn ferndel Jars touor(e)n vor Purificat(i)o(n)is Marie vorkundigen vnd tho wetten dhun , Vnnd derme na der verkundinge up Purificat(i)o(n)is Marie , schollen vnnd willen wij om(e) synen eruen . Testa=/mentarien edd(er) deme Jnhebber(e) dusses briues mit synen guden willen dye Souenhundert Vnwandelbar Rinsche gulden houetsu(m)me mit den Viertigh Rinische gulden Jarliker tynsze denne bedaget , vnnd mit allen hinderstelligenn vnnd / vorseten tynszen efft dar welke hinderstellig vnnd vnu(er)gulden wer(e)n gebleuen bynnen der Oldenstad Magdburgh edder Brandenborgh wur sie dat leuest nehmen willen full vnnd all gutliken vnnd wol to dancke vornugen gheuen / vnnd [...] vnbeku(m)mert aller gerichte . Vnnd vngehind(er)t von eyneme yderma(n)ne vnnd aller herr(e)n geboth vnuorboden sunder alle geferde . Vnnd we(re)t sake dar wij der betalinge der Jarliken tynse nach bedaginge vnnd vormaninge tho recht(er) / tynsze tijd nicht en deden , So gheuen wij deme genomeden her(e)n Mauricio Schonow synen eruen , Testamentarien edder den Jnnhebbern(e) dusses briues mit synen guden willen die macht , Dat Jm sampt . Vnnd in sunderheit den Rade / tho Stendall edder die Borger gemeyne Edder eynen iewelken besunder(e)n daru(m)me mit rechte geistlikes efte wertlikes gerichtes anlangen Vnnd sick der tynsze an ohn(e) edder oren ghuder(e)n erhalen mogen wur sie konne(n) edd(er) moge(n) ane alle behelp . Jnsage / iegendede vnnd geferde Tho orkunde steder vnnd vaster holdinge aller Artikele disses briues So hebben wij Borg(er)meister(e) vnnd Rathmann(e) der Stadt Stendall vnnd Rades Jngesegel vor vnns vnd alle vnse nakomende Burg(e)rmeister(e) vnnd Rathmanne(e) / vnnd Borger gemeyne vnnden an dissen openbreff lathen hangenn vnnd wij Johannes von Gots gnaden Marggraue Tho Brandenburgh des hilgen Romischen Rychs Ertzekemmerer vnd Churfurst tho Stettyn Pomern der Cassuken vnnd / Wenden hertoge . Borggraue tho Norembergh vnnd Furste tho Rugen Bekennen ock in dissem briue vor vnns vnser eruen vnnd nakomenden Marggraue(n) tho Brandenborgh dat sodane kopp vnnd verscrifinge so vorberurt steit von vnser leuen ge=/truwen von Stendall nach orer bede mit vnnsen wetten willen vnd gantzer fulborth geschein iszt vnnd stede vaste vnnd vnu(er)broken geholden schal werden ane alle Insage vnnd behelp . Vnnd hebb(e)n des ock tho mehrer szicherheit vnnser Ingesegell / heiten vnnd dhon hangenn an dussen breff De Gegeuen ist Nach der geborth (cristi) vnnsers herr(e)n dusend vierhund(er)t dar na in dem(e) Twevnd Negentigsten Jare am dage Purificationis Marie v(ir)ginis . Dath my gnanter Mauricio(s) vo(n) Schonow / doctor vnnd Domherr(e) ouen angeczeigte briue mit etlikem gelde kleynoden vnnd andern van affhanden komen vnnd gestoln is Der haluen ik de durchluchten vnnd hochgebornnen Furstenn vnnd herr(e)n her(e)n Joachim des heilgen Romischen Richs Ertzkamerer vnnd Churfurstenn vnd hern Albrechtenn gebruder Margg(ra)uen tho Brandenborgh tho Stettin Pommer(e)n der Casuben vnnd wenden hertogen Borggrauen tho Norembergh vnnd Fursten tho Rugenn myne /Gnedigstenn vnd Gnedigenn her(e)n vnderdeniglich ersucht vnnd gebe­denn hebbe, Mik vnnd de gnanten Hannszen vnnd Mauritzen von Schonow myne Vedderen by obgedachtenn Borg(er)meistern vnnd Rathmanne(n) der Stad Stendall / gnedichlik tho vorbidden, vnns solke vorscrifunge vpp vnser dryer personen eruen vnnd erffnemen tho vor ander(e)n vnnd von nygens upteyken Als danne gescheen Inholt der briue dar ou(er) vthgegan Des ick eren Furstliken gnaden vnderdaniglich / Burg(er)meisternn vnd Rathmannen boue(n) gnant fruntlick dangksegge , So nu myne Veddern Jk vnnd vnse eruen mit andern briuen, wu vorgemeldt der datu(m) steyt am(e) Sondage Vocem Jocunditat(is) verteinhund(er)t vnd Negenvnd Nege(n)tigiszten Jar(e) / von den van Stendall gnuglick vorsorget syn , Daru(m)me wij billigk Segge ik obgnanter Mauricius Schonow vor mik Hanszen vnnd Mauritzenn von Schonow myne vnmu(n)dige Veddern alle vnnse eruen vnnd erffnemen, Testamentarienn / vnnd inhebber der briue des obgnanten Borgermeister vnnd Rathmann(e) der Stadt Stendall solker erstenn bouen van worden tho worde ingelechter vorscrifinge briue vnnd Jngesegel Qwijd leddich vnnd losz Jn crafft vnnd macht disses briues / Rede vnd loue dar tho , by mynen guden war(e)n tenwen ? vor mik myne boue(n)gnante Veddern Vnnde eruen vnd Testamentarien Efft sick v(m)mer mehr alzo begeüe dat die obgedachte erste vorscriui(n)ge vnnd breue my gestol(e)n vnd dufflik ? entwar(en) / in volgenden tyden vnnd Jar(e)n wedderu(m)me gefunden vorgebracht edder angezeigt wurden dorch vnns edd(er) ander(e) we de wer(e)n edd(er) syn mochten , den suluigen briue(n) keynen ? gelouen tho gheuen , sunder sie schollen crafftlosz vnd machtlosz syn / vnnd vortygen vnns ser seluigen in crafft vnnd macht disses briues alzo dat die Ersamen Borgermeister vnnd Rathmann(e) der Stad Stendall vnnd or(er) nachkomen nü noch henford nu(m)mer nicht selker briue haluen mit geistlichen noch mit wertlikenn / gerichten edder rechten edder ane recht gemanet noch angelangt scollen werden Sundern scollen gantz vnnd ghar vwu vorscreuen crafflosz synn . Des tho waren Bekentnisz hebbe ik Mauritius Schonow obgnant vor mik vnd de gn(an)ten / hanszen vnnd Mauritzen von Schonow myne Veddern alle vnse eruen vnd erffnemen Testamentarien Vnnd alle die Jennen So den obedachten entwanten vnnd gestol(e)n briff ynnehebb(e)n edder henforder tho sik bringen muchten myn Jngesegel an dissem / briue hengen laten Vnnd des tho mehrer sekerheit Die Werdigen herr(e)n ern Albrecht klitzingk Domherr(e) tho Magdburg Prouest tho Hamborgh Vnnd ern Wyprecht von Barby Thumherr(e) vnnd Thesaurarius der gedachten kercken to Magdburgh / fruntlich gebeden dat sie or(e) Jngesegele nesen dat my(ne) hebben hengen lathen . Des wij obgnanten ern Albrecht vnnd ern Wyprecht mit vnse(re)m guden wetten vnnd willen geschein bekennen, doch vnns vnnd vnnsen eruen vnschedelick / Geuen tho Magd(burg) / Am(e) Sundage Vocem Jocunditat(is) Nach cristi geborth viertzehnhund(er)t vnnd ym(e) Negenvnnd Negentigistenn Jar(e) /