Jck Bartolome(us) perdestorpp Borger thom(e) Groten Soltte Bekenne openbar In dussem mynen breue vor mik myne eruen erffnhemen vnde vor alszweme de ohn sehn edder horen leszen Dath ik mith / wethen willen wolbedachtem mode vnde fullenkomen vnde myner frunde den hochgebornnen werdigen vnde achtbaren herren domproueste deken Eldesten vnde Capittel gemeyn der dhombergh(e)n / to magdborch mynen gnedigen vnde gunstigen liuen herr(e)n recht vnde reddeliken erffliken vorkofft hebbe vnde verkope ock In crafft dusses breues synen holttwerder Seuen morgen grases Seuen / morgen ackers vnde vehir wuste morgen to sa(m)mende achteyn morgen den tigh to altana mit aller syner to behoringe mith grasze holtte vnde anderer(n) tobehoringe wu men dy mith sunder=/liken worden nomen mach alle Im(e) gerichte to Schonebegk gelegen vnde , alse dy sulfften gudere valentin perdestorpp myn vader zeliger vnde ik nach ome von eyne(m) werdigen Capittele / tho Magdeborch edder orem parcatori wente her to na lude briffe vnde Sigill der wegin vnde dar ouer gegeuen to menliken lehne gehad hebbin vnde hebbe one dÿ gegeuen vor viffhün=/dert vnde twintich gude rinische gulden dÿ mik ore werdichheide dar vore an bereydem getaldem golde gutliken vnde wol to dancke [v(er)gnugelt ?] vnde betalett vnde dy ik alszo von one ent/pfangen vnde forder In mynen vnde myner eruen nutt vnde fromen dar des noit vnde behuff was gekardt vnde gewandt hebbe vnde hebbe dar neüen oren werdichheiden sodane lehnbreue / dar mede myn vader valentin pardestorpp vnde ik von orem parcatori belegen sindt willigen mit wolbedachtem mode vnde vngetwungen mit sampt dussem koppbreue vmb(e) mehr wis=/senheith vnde wisser gedechtnisse willen ouerantwerdett vnde gegeuen vnde jk Bartolomeus perdestorpp sette ock In crafft dusses breues de g(e)n(an)t(e)n herr(e)n domprouest deken Eldesten vn(de) / Capittel gemeyn der kerken to Magdeborch der vppg(e)na(n)ten gudere In eyne Kowlicke nuttlike benkende besatende fullenkomen vnde hebbende were dÿ to hebbinde vnde der / to gebruken vnde to genetende von mik mynen eruen erffnhemen vnde byne(n) yderma(n)ne vngehindert vnde ik myne eruen vnde erffnhamen schollin vn(de) willen ok dusses kopes / vnde gudere orer werdicheiden vnde orer nako(m)men rechte gewers syn wen wur vnde wu vake on des noth vnde behuff syn worde sunder yenigerleye behelpinge argelist vnde / geuerde vnde jk Katherina valentin perdestorps seliger nagelathen husfrouwe Bekenne ok opembar In dussem suluen breue dat ik sodans haltwerders mith den grasze wissch(e)n / vor Schonebigk to altana gelegen dar mede ik van dem werdigen Capittel der kerken to Magdeborch dorch vorbede vnde mithbewillinge mynes ehe werdes szeliger valentin / perdestorpps na lude des breues dar ouer gegeuen belifftuchticht was mith wethen willen vngetwungen lachende mode vnde fullenkomende Rade , byn affgetieden vnde ock In / crafft dusses breues Iegenwerdich afftrede , dar vor , mik von mynem szone Bartolomeus perdestorpp affdracht vnde gude vornügunge isz gescheen , dar tho ik ok alle frigheith / vnde priuilegien dar mede die frouwen Im(e) Rechte vnde sunderliken orer(e) lifftuchte haluen begnadt vnde begiffticht sindt nu(n)mehr mehr vpp sodane lifftucht to sakende vor / eynem openbar(e)n scriuer edder notar(e) mit hande vnde mit mu(n)de vppgesecht vnde vorlathen hebbe , vorlathe vnde vppsegghe dÿ ok Iegenwerdigen In crafft dusses breues vnde / des ok vmb(e) mehr wissentheit vnde wisste gedechtnisse willen hebbe ik erg(e)na(n)te Katherina valentin perdestorpps zeligen nagelathen husfrouwe mynen lifftuchts breff deme / werdigen Capittelle nu(m)mer mehr vppe dat gedachte liffgedinge to sakende willigen ouergeantwerdett vnde gegeuen , Alle vnde yowelke vorgeschreuen stucke punckte vnde / artikele dusses briffes Rede vnde gelobe ik obg(e)na(n)te Bartholome(us) perdesdorp v(or) mik myne eruen vnde erfnamen by mynen eren waren truwen vnde In gudem glouen den vorge/dachten mynen gnedigen vnde werdigen herren Domproueste Dekene eldisten vnde Capittele to Magdeborch dy ittzund sind vnde allen oren nachkomen stede vaste vnde / vnu(er)broken to holden sunder alle behelpinge nyefunde argelist vnde geuerde vnde des to tuchnisse vnde warer orkunde , hebbe ik myn Ingesigel vor mik myne eruen / vnde erffnamen witliken an dussen briff lathen hengen vnde ik Katherina valentin perdestorpps nagelathen hussfrouwe Bekenne ock vnder dussem mynes szones / Ingesegell von entbrekinge eynes eygen Ingesegels dat ik sodane afftichtunge vnde afftredinge myner lifftucht von vorberorth isz ok stede vaste vnde vnu(er)broken will / holden Gegeuen na cristi vnses herren geborth dusent vehirhundert dar na In deme NegenvndeNegentigisten Iare am(e) middweken nach allerhilgen dage /