Wẏ ratman van p(ar)chẏm dan thuͦ wetende allen dhe dhessen bref an zen vnde horen , Dath Johan dambeke vnse buͦrgh(ere) / ghe koft heft an des heylighenghestes hus thuͦ p(ar)chẏm zestingh m(a)rc gheldes wendescer pe(n)nighe , vor vif hundert / marc ewech thuͦ bliuende , der scal he bruken zine leuedaghe thuͦ ziner nut vnde ziner not , , vfs ? Johanes / dode , stun ? dhe zestingh marc up boren van den dhe dhes heyligheystes hus vor stan , thue ratman dhe neghest den ke=/mereren an dher bant zisten thuͦ dher luchtere(n) hant , dhe stun ze gheuen al zo hir na be screuen steẏt alle iar , , aller / ersten dhen p(er)ner van zunthe Jurian , vnde dhen p(er)n(ere) van vnser vrowe(n) binne(n) p(ar)chym inallre eyne marc , Dar scolen ze ene / van be ghan thuͦ ver thyden an deme iare , an vilghen vnde an dren zelmissen , vnde dhar thuͦ scullen ze ziner de(n)ken / alle zunendaghe an den k(er)ken openbare , , were dat ze dhes nicht dun ne wolden eder ne deden , zo scolden dhe thue marc / dhe vor sprokenen ratman , thuͦ ghodes deneste keren dar it em aller best duchthe weren , vort mer stun ze thue marc ver zi(n)ghe(n) / laten thuͦ den broderen an uilghen vnde an zel missen thuͦ ver thyden an deme iare , dar van scullen dhe broder dhes vor sproke(nen) Jo/hannes denke(n) alle zu(n)ne(n)daghe , vortmer scullen dhe zuluen ratman ver marc vor zinghe lathen alle iar , an uilghe(n) vnde an zelmisse / vor ziner zele willen , wor it em best be haghet , , Dhe andere(n) achthe m(a)rc dhe scun vor gheuen dhe vor sprokenen ratman ar/men luden dhen is not is aller grottest , ze zin we ze zin , an almissen wo dan ze willen , och scyn ze alle desse almissen gheuen al zo / ze be screuen zint , by erer zammuͦrdecheyt , vnde uppe dat ze duste vlitegh(en) an dessen almissen zin , zo scole ze der vor roreden / achthe m(a)rc v(er) scillinghe up boren thuͦ eme stoucke(n) wines , Desser dinc vnde desser almissen scolen man(e) wezen albrecht / dambeke Johan dambeken zone vnde scara(n) na dambeken dode ghyst ze leuen , eder dhe neghesthen vrent , den desse hant / vestinghe be volen wart , , vnde thuͦ ener thughine alle desser dinc zo hebbe . wẏ ratman van p(ar)chy(m) vnde her Niclau(se) / de p(er)ner van zunthe Jurian , vnde her ditmer dhe p(er)ner van vnser vrowen uppe dher nighen stat thuͦ dessen breue / vnse inghezeghel ghe heynghen , lathen , vnde dat desse dinc scuden dar was gheghe(n)wardech , Johan scara(n) . gh(er)d(es) / wittenborch hi(n)ric(e) eua(n) . h(er)r buscel . Nicola(us) lichehe , je(n)newit , luder(e) mecerke , zeyeenslegh(er) . g(ra)bowe , luttek zinlef . Thydeke / goldenbow , scone(n)berch by dher waghe , vnde vele and(ere) bedderuelude , Desse bref is ghe screuen na dher bort vnses here(n) duzent / iar vnde dre hu(n)nert iar , an deme tuelsten iare , dhes neghesten mitwekens deme achtheden daghe thuͦ pascen ,