Wy . berent vn(de) Johan vse sone Laurentius vnd(e) Johan brodere van godes gnade here(n) tuͦ werle bekennen / openbare Jn dessem breue dat wi myt vsen erue(n) vsen leue(n) truwen den erliken ratmanne(n) der stad tuͦ par=/chem . dede nu sint vn(de) eren nakomelinger scholen vnde wille(n) ghelden alle redelike schult . de en vse vedde(ren) / Johan . deme god gnedich si . schuldich was . vnd(e) van alleme redelike(n) louede neme(n) . dat se vor em ghelouet / hebben . alle olde breue de redelk sin . de se van der heͤrscap hebbe(n) . de schole wi vnde willen en gantz holden / alze se vd wisen Wat se van redeliken breue(n) hebben van vsen vorsprokene(n) veddere(n) edder van synen eldere(n) / de schole wi vn(de) willen en vornyen vnde andere breue gheue(n) alze de olden vdwiset vn(de) de sulue(n) olden breue / by aller macht beholden vnde laten . like der wis . oft wi se en sulue(n) beseghelt vnde ghegheue(n) hadden wy . / schole(n) vnde willen se ok by alleme olden rechte laten vnde nerne mede vorvnrechte(n) . Dit loue wi vorbeno/meden heren vor vs vn(de) vor vse erue(n) . vsen vorbenomeden Ratma(n)ne(n) der stad tuͦ parche(m) Jn ghuͦden truwen / stede vn(de) vast tuͦ holdende . vnde hebben des tuͦ tughe vse yngheseghele tuͦ dessem breue laten hengen , / De gheue(n) is tuͦ parch(e)m Na godes bord drutteyn hundert Jar an deme vere vnde souentighesten iare / des donredaghes na sunte lucien daghe der hilghen Juncvrowen . Hir ou(er) sint gheweset vse leue(n) truͦwe(n) / hinric leuetzowe vlric moltzan vn(de) hinr(ik) smeker Ridde(re) her hinr(ik) van plawe perner tuͦ parchem Mar/quard nossentyn Jacop leuetzowe vn(de) hennyng kampse knechte vn(de) mer ghuͦder lude de loue(n) wolle wert sin /