Wy Laure(n)tius van godes gnade here tuͦ werle beke(n)ne(n) openbare Jn desem breue Dat de erlike man . her herme(n) / koz prester na vseme rade . wille(n) vn(de) wlbort heft ghekoft seue(n)teyn marc gheldes vn(de) ver schillinghe vn(de) twe pe(n)ni(n)ghe / lubescher pe(n)ni(n)ghe alle iar vp tuͦ boren de an pacht vn(de) van lude(n) an deme dorpe tu Giscowe va(n) den erlike(n) knech=/ten he(n)neke(n) vn(de) deneke(n) bordere(n) ghe hete(n) van weltzin vn(de) van ere(n) erue(n) . alse de breue vs wiset . de em de weltzine / dar vp ghe gheue(n) hebbe(n) . hir ouer hebbe wy vorbenomede laure(n)tius he(re) tuͦ werle myt vse(n) r(e)chte(n) erfname(n) . dorch / heyl vn(de) salicheit wille(n) vser eldere(n) vn(de) vser sele . Desseme vorbenomede(n) her herme(n) cosse vn(de) syne(n) erfname(n) ghe / gheue(n) vn(de) late(n) den Eghenduͦm myt aller vriheit alse desse vorbenomede(n) seue(n)teyn marc gheldes ver schillinghe / vn(de) twe pe(n)ni(n)ghe ligghe(n) an houe(n) vn(de) an huͦuen vn(de) an kote(n) . an al erer schede an holte an velde an ackere an weide / vn(de) an watere myt alle(n) ere(n) tuͦ behoringhe(n) myt deme orse denste de vs vn(de) vse(n) erfname(n) dar af bore(n) mach . / Myt richte vn(de) myt denste tuͦ manrechte . also dat desse vorbenomede her herme(n) koz edd(er) syne erfname(n) desse / vorbenomede(n) ghulde vn(de) Jnghelt myt ere(n) tuͦ behoringhe(n) sik nutte make(n) mach tuͦ donde vn(de) tuͦ late(n)de [...] / Eghenduͦme tuͦ ener ewighe(n) viccarie edd(er) an godes denst tuͦ kerende also em edd(er) syne(n) erue(n) dat beste ener . / su(n)der weddersprake vn(de) bewernisse vser vn(de) vser erue(n) . Were ok dat desse vor benomede her herme(n) edd(er) syne / erfname(n) dyt vorbenomede Jnghelt an desseme vorscreuene(n) guͦde vorkofte vorsettede edd(er) vor gheue ghestlik / edder werlik . vnde weme he oft vorkofte vorsettede edd(er) gheue . Deme scal desse bref also hulpelk vn(de) so brukelik / were(n) an aller wise alse wy ene deme vorbenomede(n) her herme(n) vn(de) syne(n) erfname(n) ghe gheue(n) vn(de) beseghelt hebbe(n) / Tuͦghe hir ouer synt ghe weset . her Joha(n) van grabowe ridder . her hinric va(n) plawe vnde her Rolef luͦchen p(re)stere / vorbenomede laure(n)tius here tuͦ werle vse Jnghezeghel vor vs vn(de) vse erue(n) myt wille(n) vn(de) myt witscop vor dessen / bref late(n) henghen . Na godes bort dusent iar Drehu(n)dert iar an deme soue(n) vn(de) soue(n)degheste(n) iare an su(n)te gregori(us) / daghe des hilghen lerers