Wy borghermeste(re) vn(de) Ratma(n)ne der stad tho parchem . olde vn(de) nyge de nuͦ synt vn(de) de noch tho kome(n) moghe(n) . beke(n)nen / vn(de) betughe(n) openbar i(n) desseme breue Dat wy hebbe(n) ghe orlouet Deme beschedene ma(n)ne Tilen va(n) kampe(n) vnsen mu(n)ter / lutlike witte pe(n)ni(n)ghe tho slande . Dar veere ene(n) witte(n) pe(n)ni(n)gh scole(n) ghelden . De lodighe mark twe schillinghe hogher / wan De va(n) luͦbike sloghen by wilkor synes houedes vp eyn que(n)tin na myn edd(er) mer vnvorbroken . Des scal he vns gheue(n) / tho sleghelscatte veer bleyne pe(n)ni(n)ghe va(n) der mark ghe weghe(n) . Vortmer scal me neme(n) vte deme huͦpen dre pe(n)ni(n)ghe edd(er) / veere vn(de) scal de werpe(n) i(n) de busse . vn(de) scal dar mede vortvare(n) i(n) aller mate vn(de) i(n) alleme r(e)chte vn(de) vorworde(n) alzeme myt deme / witte(n) ghelde doͮt . alle desse stuͦcke loue wy borghermeste(re) vn(de) Ratma(n)ne der stad tho parche(m) vorbenomet Deme vorbenomede(n) / Tile(n) va(n) kampe(n) stede vn(de) vast tho holde(n)de su(n)der alle arghelist vn(de) hebbe(n) des tho tuͦghe vn(de) tho bekantnisse vnser stad Jnghezeghel / myt guͦdeme wille(n) vn(de) endraftighe(n) late(n) henghe(n) vor desse(n) bref , De gheue(n) vn(de) screue(n) is tho parchem na godes bort Duͦsent / iar Drehu(n)dert iar Jn deme veer vn(de) achtigheste(n) iare Jn su(n)te andreas daghe Des hilghen apostels /