In godes name(n) amen . Nod is der dingh De ze scheen vn(de) Jeghene(n) i(n) der tyd myt beradene muͦde vn(de) godeme wille(n) . Dat me de stedeghe vn(de) vesteghe / myt breue(n) edder myt tuͦghe(n) lefdegher lude . We(n)te des my(n)schen dachtnisse kranc vn(de) vorghenkelk is . Hir v(m)me is Dat wy Ratma(n)ne der stad tuͦ / parche(m)¹ . De nuͦ Jeghe(n)werdich synt vn(de) de noch tuͦ kome(n) moghe(n) . beke(n)ne(n) vn(de) betuͦghe(n) openbar Jn desseme br[e]ue vor alle(n) criste(n) lude(n) De desse(n) bref zeen / edder hore(n) lezen . Dat wy myt gantzer endracht vn(de) wlbort vn(de) na rade vnser wiseste(n) . hebbe(n) vorkoft vn(de) Jeghe(n)w(er)delke(n) vorkope(n) tuͦ eneme ewighen / kofte(n) kope reddelke(n) vn(de) rechtlke(n) ? . Deme wise(n) beschedene(n) ma(n)ne Gherd kosse va(n) plawe ² borgher tuͦ parche(m) vn(de) syne(n) r(e)chte(n) erue(n) . Drutteẏnde halue / mark Jngheldes lub(escher) pe(n)ni(n)ghe Jn deme dorpe tuͦ giscowe³ Dat dar licht i(n)der voghedie tuͦ parchem . alle iar vp tuͦbore(n)de tuͦ su(n)te mycheles daghe / va(n) den houe(n) vn(de) vte de(n) houe(n) Dar nuͦ vppe wone(n) Desse nascreuene lude alze hinseke wantsnyder Dese gift sostehalue mark lub(esch) . Clawes grelle / vif mark lub(esch) . herme(n) weuer ene mark lub(esch) vn(de) hinseke grelle ene mark lub(esch) . edder va(n) ere(n) nakomeli(n)ghe(n) . de de houe(n) buͦwe(n) edd(er) de høue besitte(n) / vor anderhalf hu(n)dert mark vn(de) vifvn(de)twintich mark lub(escher) pe(n)ni(n)ghe .⁴ De vns tuͦ noghe vn(de) tuͦ danke wol beret syn . myt aller vryheit vn(de) nutte=/gheyt . i(n) holte i(n) velde i(n) water i(n) weyde i(n) ackere ghebuwet vn(de) vnghebuͦet i(n) weghe(n) vn(de) i(n) vnweghe(n) i(n) bruͦke(n) i(n)visscherie . myt denste richte vnde / broke tuͦ ma(n)rechte . vryg(e) vn(de) ewich tuͦ hebbe(n)de vn(de) tuͦ besitte(n)de su(n)der hinder vn(de) weddersprake vnser vn(de) vnser nakomeli(n)ghe . Dyt zulue guͦd / mach gherd koz vorbenomet myt syne(n) fru(n)den pande(n) . wa(n)ne vn(de) wo dicke em des nod is . vn(de) de pande vore(n) Dryue(n) edd(er) bringhe(n) i(n) de stad tuͦ p(ar)che(m) / vn(de) vor syne jarlikes pleghe vt tuͦ sette(n)nde s(n)der richte edd(er) broke . Ok scole wy vn(de) wille(n) dyt vorscreuene guͦt vorheghe(n) vordeghedinghe(n) alze / vnseme ande(re)n guͦde wor wy dat hebbe(n) . vn(de) endfrige(n) va(n) aller ansprake . Ok mach gherd koz vn(de) syne erue(n) dyt vorbenomede guͦt vn(de) Jnghelt / vorkope(n) vorbute(n) vorgheue(n) edder legghe(n) tuͦ ewighe(n) vicarie(n) . edd(er) tuͦ ande(re)n milde(n) almisse(n) ghestlik edd(er) werlik . wor em dat alder enest ku(m)pt / Vnde wille(n) ok desse lude vorscreue(n) edd(er) ere nakomeli(n)ghe De desse houe(n) buwe(n) edd(er) de høue besitte(n) nerghe(n) mede besware(n) myt nyger bede . / bescattinghe edd(er) vmplicht edd(er) Jn(n)ma(n)t va(n) vnser weghene . vnde gheue(n) ouer aldes Dat desseme breue tuͦ scade(n) kome(n) mach . neghe(n) mede / tuͦ brekende edd(er) tuͦ hindernde . men wy vn(de) vnse nakomeli(n)ghe scole(n) vn(de) wille(n) dat also holde(n) i(n) allermate alze desse bref , vtwiset . alle desse / vorscreuene dingh loue wy Ratma(n)ne der stad tuͦ parche(m) myt vnse(n) nakomeli(n)ghe(n) . Deme vorbenomede(n) . gherd kosse va(n) plawe borgher tuͦ / parche(m) vn(de) syne(n) r(e)chte(n) erue(n) . vn(de) weme he dat gift edder vorlet by wolmacht edd(er) i(n) krancheyt synes leue(n)des stede vn(de) vast tuͦ holde(n)de su(n)der alle / arghelist , vn(de) hulperede Vnde hebbe(n) des tuͦ tuͦghe vn(de) tuͦ bekantnisse vnser stad Jnghezeghel myt vnser aller witscop vn(de) godeme wille(n) laten / henghe(n) vor desse(n) bref . De gheue(n) vn(de) screue(n) is tuͦ parche(m) na godes bort Dusent iar Drehu(n)dert iar Jn deme vif vn(de) achtigheste(n) iare . Jn su(n)te / marcus daghe des hilghe(n) ewangeliste(n) . Hir ouer sint ghewzet Erlike wise lude . alze her hinric va(n) plawe kerche(re) tuͦ su(n)te Juͦrie(n) tuͦ parche(m) / her gherd giscowe kerche(re) tuͦ vnser vroͮwe(n) dar zulues . her meynard va(n) dene haghene p(re)stere . He(n)neke vn(de) deneke bruͦde(re) ghe hete(n) weltzine / knechte . vn(de) mer guͦder lude de loue(n) wol werdich syn /