In godes namen amen wẏ borghermeste(re) vnde Radlude der stad tho parchem beke(n)nen vnde betughen ope(n)bar an / desseme breue vor alle den ienen de ene zeen . edder horen lezen . dat wy mẏd gantzer endracht vn(de) vulbort / vnde na rade vnser wẏsesten hebben ghe lecht vnde laten vnde ieghenwardeghen legghen vnde laten en / desseme breue . Tho eẏner ewẏghen vicarien in der kerken tho su(n)nte iurien tho parchem dar hans plote de / leenware ane hebben . scal vnde synen r(e)chten erue(n) tho ewẏghen tyden de her nicolaus gruder prester kerk=/here tho der sloten nu heft vn(de) ieghenwardeghen bezẏt teẏn m(a)rk jngheldes lub(escher) pe(n)nẏnghe alze tho parche(m) / ghenghe vnde gheue synt jn deme dorpe tho giscowe dat dar licht an der voͮghedie tho parchem alle iar vp / tho borende thuͦ su(n)te michael daghe van den hoͮuen . vnde vt den høuen dar nu vppe zẏtten vnde wone(n) desse / nascreuene(n) lude alze he(n)neke bicherman dede ghift vif m(a)rk lub(esch) . Clawes went vif m(a)r lub(esch) vn(de) van eren / nakomelynghen de de hoͮue(n) buwen vnde de høue bezẏtten mẏd aller vrigheyt eghendum vnde nuttecheẏt / An velde . an holte . An watere . an wẏschen . An wÿde . an ackere buwet . vn(de) vnghebuwet . An weghen . vnde / an vnweghen . An bruͦken . an puͦlen . An vischerie . mẏd denste . mẏd richte hoghest vn(de) zydest alze an hant / vnde hals . vnde allen broͮke . mẏd aller bede deme beden . edder bydden mach . vrigh tho ewyghen tyde(n) mẏd / alleme heren rechte . vns vnde vnsen nakomlynghen dar degher vnde ga(n)s nycht ane tho be holdende jd zẏ / an desseme breue be noͮmet edder vnbenoͮmet . vnde hebben des tho tughe vn(de) tho be kantnisse vns(er) stad / Jnghezeghel vor vns vnde vor vnse nakomelynghe vor dessen bref ghe henghen laten de ghe gheuen / vnde screue(n) is na godes bort dusent iar drehu(n)dert iar . an deme veer vn(de) neghenteghesten iare des / Sundaghes na sunte margareten daghe der hilghen ju(n)cvrowen