Wir Sigismund van gotes gnade markgrafe tzu brandemburg vnd des hiligen Romischen riches obirster kamerer / Bekennen vnd tun kunt offenlichen mit desem briue allen den die yn sehen oder horen lesen daz wir vnßn Bur=/gern der Stat premslaw die nu seyn vnd noch tzu komende sein vnßn lieben getrewen befestet vnd bestetiget / haben beuesten vnd bestetigen mit desem briue alle ire freiheit alle ire rechtikeit vnd alle ire alde gewon=/heit vnd woll(e)n vnd sull(e)n sie lassen vnd behalden bey eren vnd gnaden dar si in vorgangen tzeiten sint gewe=/sen duch woll(e)n wir vnd sull(e)n yn halden alle ire briue die si haben von fursten vnd furstinnen vnd woll(e)n / vnd sull(e)n sie sunder allerleye hindernusse lasen vnd behalten mit allen gnaden mit aller freiheite vnd rechti=/keit bey allen iren lehen eigen vnd erben als sie das vorgehabt haben vnd besessen duch woll(e)n vnd schullen wir / Ritter knappen Burgern vnd geburen mit allen luten gemeynlich beide geistlichen vnd wertlichen halden alle ire / briue vnd woll(e)n sie lasen by irer freiheite by allen rechten vnd gnaden duch sull(e)n vnd wollen wir vnd vnß noch / komelinge des mit nichte tu staden vvlworden ? noch guͦnnen dat sie oder ire nachkomelinge vt irer Stat geladen / werden an vmb hantheftige tate sunder si sull(e)n tzu rechte stan vor irem Schultem wer et auch das en oder iren / nachkomelinghen eynige brieffe vorgiengen vnd vorgangen weren dy sull(e)n wir vnd vnß nachkome=/linghe von worte tu worten nach dem lutte der briue als sie gewesin sein widergeben veruewen vnd bestetige(n) / on gift vnd one gabe vnd ouch das sie von vnßn amptleuten ny(m)mer in kemen ziten geirret gehindert oder / gekrenket noch von der marke gewiset sull(e)n werden in keiner weis sunder sie sull(e)n daby vngehindert vn=/gewret vnd vngekrenket ewiclichen bliben in aller masse als sie von alders her geweset sin vnd als si / des van vnßin liebem vater keiß karl vnd van dußin lieben brude her wenzlaw Romischer konig vnd konig / tzu Behenn vnd von allen vnßn vorfarn Markgrafen tzu Brandemburg briefe haben ant vrkunde ditz briues / versigelt mit vnßin Jnsigel Geben czu premslaw nach cristus geburte driczenhundert iar darnach in dem acht vnd sibenczigsten Jare an vnß vrowen tage geheisen assu(m)pcio